Qyrǵyzstan memlekettik ulttyq qaýipsizdik komiteti eldiń burynǵy prezidenti Almazbek Atambaevty ustaý operatsiiasyn arnaiy jasaq kúshteri júrgizip jatqanyn habarlady, dep jazady Azattyq.
Komitet arnaiy jasaq tek rezeńke oqtarmen qarýlanǵanyn, operatsiia jalǵasyp jatqanyn málimdedi.
7 shilde Bishkek ýaqyty boiynsha keshki segiz shamasynda Koi-Tashtaǵy Atambaev úiine arnaiy jasaq kelgeni belgili boldy. Atambaevtyń jaqtasy Mirbek Aitikeev áleýmettik jelide tikelei transliatsiia taratty. Videoda Atambaev úiiniń mańynda maska jáne arnaiy jasaqtyń formasyn kigen qarýly adamdar kórindi. Videodan myltyqtyń daýysy da estildi.
Azattyqtyń Qyrǵyz qyzmeti kem degende 15 adamnyń jaralanǵanyn, birazyn aýrýhanaǵa alyp ketkenin habarlady. Jaralanǵandardyń arasynda 24.kg saitynyń tilshisi Aida Jýmasheva da bar. Onyń aiaǵyna rezeńke oq tigen. Eldiń densaýlyq ministrligi Koi-Tashqa 8 jedel járdem brigadasy jiberilgenin málimdedi.
Azattyqtyń Qyrǵyz qyzmetiniń tilshileri Koi-Tash aimaǵynda uialy bailanys nasharlaǵanyn, aýylǵa kireberiste politseiler turǵanyn habarlady. Atambaevtyń jaqtastary Koi-Tashqa kirer joldaǵy aǵashtardy qulata bastaǵany da aityldy.
27 maýsymda Qyrǵyzstan parlamenti Almazbek Atambaevty eks-prezident jáne tiispeýshilik mártebesinen aiyrǵan. Keiin IIM Atambaevty tergeýge shaqyra bastady.
Qyrǵyzstannyń burynǵy prezidentine qyzmette júrip jemqorlyqqa jol berdi, ókiletin asyra paidalandy jáne zańsyz baiydy degen siiaqty jalpy sany bes aiyp taǵylǵan. Atambaev bul aiyptardyń bárin joqqa shyǵaryp, ústinen qozǵalǵan istiń saiasi astary bar dep málimdegen.
Atambaevtyń ondaǵan jaqtasy 22 maýsymnan beri onyń Koi-Tashtaǵy úiiniń mańynan lager quryp, shtab ashqan. 3 shildede Bishkekte Almazbek Atambaevtyń jaqtastary narazylyq sharasyn ótkizip, qazirgi biliktiń otstavkaǵa ketýin talap etti. Bul sharaǵa Atambaevtyń ózi de qatysqan.
Shildeniń sońynda Atambaev Reseige baryp kelgen. Onda Resei prezidenti Vladimir Pýtinmen kezdesken. Atambaevtyń sózinshe, ol Pýtinmen Qyrǵyzstandaǵy ahýal, saiasi turaqtylyq qajettigi jaily sóilesken.
Kremldiń habarlaýynsha, Pýtin Atambaevpen "aimaq pen Qyrǵyzstandaǵy ahýaldy" talqylaǵan. Habarlamada Pýtinniń qyrǵyzdardy qazirgi prezident tóńireginde toptasyp, memleket damýyna kómektesýge shaqyrǵany da aitylǵan.
