Qyrǵyzstan prezidenti Sadyr Japarov Túrkiiadan satyp alynǵan "Bairaktar" appparatyn kórip tur.
Qyrǵyzstan Túrkiiadan ushqyshsyz ushatyn "Bairaktar" apparatyn satyp aldy. "18 jeltoqsanda "Bairaktardy" prezident Sadyr Japarov baryp kórdi" dep habarlady Qyrǵyzstan prezidentiniń baspasóz qyzmeti. Bul aqparatta "Bairaktardyń" Qyrǵyzstan Shekara qyzmetine berilgeni aitylǵan.
Qyrǵyz prezidenti baspasóz qyzmetiniń málimetine qaraǵanda, respýblikalyq biýdjet esebinen satyp alynǵan "Bairaktar" el qorǵanysy men shekara kúzetin qamtamasyz etpek.
Qyrǵyzstannyń Túrkiiadan "Bairaktar" satyp alatyny jaiynda biyl 21 qazanda Qyrǵyzstan memlekettik qaýipsizdik komitetiniń tóraǵasy Qamshybek Táshiev aitqan bolatyn. Biraq ol qansha aqshaǵa qansha "Bairaktar" satyp alatynyn naqtylamaǵan.
Táshiev "Bairaktar" álemniń bes-aq elinde bar, biz - sonyń birimiz. Reseiden de "Orlan-10" ushqyshsyz apparatyn satyp aldyq",- degen bolatyn.
Qazannyń 23-ine baspasóz konferentsiiasyn ótkizgen prezident Sadyr Japarov Qyrǵyzstan áskeri tehnikasyn jańartý úshin 100 million dollar bólingenin jáne Túrkiia men Reseiden ushqyshsyz apparattar satyp alynǵanyn habarlaǵan.
- Janjal shyǵarý úshin emes, elimizdiń qaýipsizdigin saqtaý úshin satyp alyp otyrmyz. 30 jylda qolymyzǵa qarý alyp ózgeniń jerin basyp alǵan emespiz. Biraq jerimizge kóz salatyndar bolsa, jaýap óte qatań bolady,- dedi Sadyr Japarov.
Qyrǵyzstannyń Tájikstan men Ózbekstan arasyndaǵy shekarasy qazirge deiin tolyq demarkatsiialanbaǵan. Qyrǵyzstan men Tájikstan arasynda buǵan deiin birneshe ret jer daýy shyqqan. Biyl kóktemde eki el shekarasynda atys bolyp, eki jaqtan júzge jýyq adam oqqa ushqan. Burynyraq Qyrǵyzstan men Ózbekstan arasynda da osyǵan uqsas janjaldar bolǵan.
