Qyrǵyzstan prezidenti Sooronbai Jeenbekovtiń keńesshisi Aibek Azyrankýlov 30 maýsymda eks-prezident Almazbek Atambaevtyń Koi-Tash aýylyndaǵy úiine bardy. Jýrnalisterge bergen kommentariiinde ol óziniń biyl sáýir aiynda qyzmetten ketý týraly ótinish jazǵanyn aitty.
"Bári zań aiasynda bolýy tiis. Halyqtyń narazylyǵyn baiqap otyrmyz. Men 2006 jyldan beri Qyrǵyzstan sotsial-demokratiialyq partiiasyndamyn. Biz bárimiz úlken komandada birge bolǵan edik" dedi ol.
Azyrankýlov qyzmetten ketetini jaily ótinish berýin óziniń jeke pozitsiiasyn bildirý dep túsindiredi. "Eger aryz jazsam, iaǵni kelispeimin" dedi Azyrankýlov.
Eks-prezident Almazbek Atambaev Azyrankýlovtyń bul áreketin quptaitynyn aitty.
27 maýsymda Qyrǵyzstan parlamenti eldiń burynǵy prezidenti Almazbek Atambaevty tiispeýshilik mártebesinen aiyrdy. Sol kúni ótken jiyn kezinde 109 depýtattyń 103-i bul týraly sheshimdi qoldap, altaýy qarsy daýys berdi.
Endi tergeý organdary Atambaevty ustap, ony tergei alady. 26 maýsymda Bas prokýratýra Atambaevqa taǵylǵan jemqorlyq, zańsyz baiý jáne laýazymyn asyra paidalaný siiaqty aiyptarǵa negiz bar dep habarlaǵan.
