Búgin qyrǵyz-tájik shekarasy ýchaskeleriniń birinde shekara mańyndaǵy aýyldardyń turǵyndary arasynda janjal boldy. Jappai qaqtyǵys saldarynan qyrǵyz shekarashylarynyń biri jaraqat aldy.
Qazirgi ýaqytta qaqtyǵystyń sebebi anyqtalyp jatyr. Oǵan eki jaqtan 180-ge jýyq adam qatysty, dep habarlady Sputnik Qyrǵyzstan.
Urys-keristiń sońy jyldam keskilesken qaqtyǵysqa ulasqan, olar bir-birine tas laqtyra bastaidy. Oqiǵa ornyna eki jaqtan kelgen shekarashylar, quqyq qorǵaý organdarynyń qyzmetkerleri men oblystyq ákimshilik basshylary janjaldy toqtatty.
Qyrǵyzstannyń memlekettik shekara qyzmetiniń málimetinshe, kelissózder barysynda tájik tarapynan oq atylǵan. Saldarynan shekarashy jaralandy.
"Kelissózder barysynda saǵat 11:30-da tájik tarapynan belgisiz bireýler Qyrǵyzstan azamattaryna tas laqtyra bastady, jaýap qaitarylǵan kezde tájikstandyqtarǵa tiesili eki kóliktiń aldyńǵy áinegi synǵan. 20 minýttan keiin tájik tarapynan, aldyn ala málimet boiynsha, usaq kalibrli qarýdan oq atyldy. Saldarynan Qyrǵyzstan IIM Ishki áskerleriniń sarbazy jaraqat aldy", - dep habarlady Qyrǵyzstannyń memlekettik shekara qyzmetiniń baspasóz qyzmeti.
Habarlamada kelissózderdiń ýaqytsha toqtatylǵany, eki eldiń biligi jergilikti turǵyndarmen túsindirý jumystaryn júrgizip jatqandyǵy aitylǵan.
Shekaralas aimaqtaǵy jaǵdaidy turaqtandyrý úshin bas shtab bastyǵy – vedomstvo basqarma tóraǵasynyń birinshi orynbasary Ábdikárim Álimbaev Batken oblysyna ushyp ketti.
