Qyrǵyz Úkimeti apparaty qyzmetkerleri arasynda COVID-19 koronavirýs infektsiiasynyń bar-joǵyn anyqtaý úshin saraptama júrgizildi, dep habarlaidy Kabar agenttigi.
«Saraptama qorytyndysynda 26 qyzmetkerden koronavirýs infektsiiasy tabylyp otyr. Osydan eki kún buryn 11 adamnan virýs tabylǵan edi. COVID-19-ǵa qaita jasalǵan saraptama barysynda taǵy virýs 15 qyzmetkerden tabyldy. Olardyń arasynda Premer-Ministrdiń keńesshileriniń biri Artem Novikov pen Úkimet basshysynyń kómekshisi bar. Úkimet apparatynyń jetkshisi - ministr Taalaibek Temiráliev bailanysta bolǵan adam retinde qazirgi ýaqytta oqshaýlanǵan», - delingen taratylǵan aqparatta.
Sanitarlyq-epidemiologiialyq is-sharalar algoritmine sáikes, olardyń barlyǵy da úi karantinine jiberilip, tiisti em alyp jatyr. Olardyń basym bóliginde aýrý simptomsyz ótip jatyr. Virýs juqtyrǵandarmen bailanysta bolǵan adamdar da anyqtalǵan. Qyrǵyz Respýblikasy Úkimeti apparaty qyzmetkerleriniń basym bóligi qashyqtan jumys isteýin jalǵastyryp jatyr.
Buǵan deiin Qyrǵyz Prezidenti apparatynyń 17 qyzmetkerinen jáne Memleket basshysy apparatynyń jetekshisi Dosaly Esenalievten koronavirýs tabylǵany habarlanǵan bolatyn.
27 maýsym kúni Qyrǵyzstanda koronavirýs juqtyrýdyń 309 jaǵdaiy tirkelgen. Búginde bul elde COVID-19-ben 4 513 adam aýyrdy. Onyń ishinde 2 212 adam jazylyp, aýrýhanalardan shyǵarylsa, qaza tapqandardyń sany 46 adamǵa jetip otyr.
Esterińizge sala ketsek, 24 maýsymda Máskeýde Qyrǵyzstan prezidenti Sooronbai Jeenbekovtiń qasynda birge júrgen eki adamnyń koronavirýsqa tapsyrǵan analizi oń nátije bergen edi.
Osyǵan bailanysty Qyrǵyzstan prezidenti Jeńistiń 75 jyldyǵyna arnalǵan sharaǵa qatysýdan bas tartqan bolatyn.
