Qyrǵyzstannyń memlekettik ulttyq qaýipsizdik komiteti (MUQK) parlamenttiń burynǵy depýtaty jáne "Respýblika - Ata Jurt" partiiasynyń lideri Ómirbek Babanovqa tergeýge jaýap berýge shaqyrtý jiberdi. Bul týraly Azattyqtyń Qyrǵyz qyzmeti habarlady.
MUQK baspasóz qyzmetiniń aqparatynda Babanovtyń 2017 jyly 28 qyrkúiekte Osh qalasyndaǵy Ámir Temir shaǵyn aýdanynda sailaýshylarmen kezdesýinde aitqan sózderine bailanysty buǵan deiin bas prokýratýra qozǵaǵan qylmystyq is aiasynda tergeýge shaqyrtylǵany aitylǵan.
"Ómirbek Babanov bul qylmystyq iste kýáger sanalady" dep habarlady MUQK.
19 tamyzda Babanovtan qarjy politsiiasy jaýap alǵan. Keiin Babanov jýrnalisterge tergeýshiler ózine "Qyrǵyzstan" bankine bailanysty is boiynsha suraqtar qoiǵanyn habarlaǵan. Tergeý jaily aqparatty jariialamaý týraly qolhat bergenin alǵa tartyp, ol istiń jai-japsaryn ashyp aitpaǵan.
Buǵan deiin MUQK Babanovtan eki qylmystyq is boiynsha jaýap alynatyny týraly málimdegen. Onyń birinshisi Ámir Temir shaǵyn aýdanyndaǵy sailaýshylarmen kezdesýinde aitqan "negizsiz, arandatý sipatyndaǵy" sózderine bailanysty, ekinshisi - bilikti kúshpen basyp alý jáne jappai tártipsizdikterge daiyndalý faktisi boiynsha qozǵalǵan. Ekinshi is buǵan deiin ýaqytsha toqtatylǵan.
Qyrǵyzstanda 2017 jyly ótken prezident sailaýynyń resmi qorytyndysy boiynsha prezidenttikke kanidat Ómirbek Babanov ekinshi oryn alǵan. Sailaýǵa deiin Babanov Qazaqstannyń sol kezdegi prezidenti Nursultan Nazarbaevpen kezdeskennen keiin resmi Bishkek Astanany (qazirgi Nur-Sultan) "Qyrǵyzstannyń ishki isine aralasty" dep aiyptap, eki el bir-birine narazylyq notalaryn joldaǵan edi.
Sailaýdan keiin Qyrǵyzstannan ketip qalǵan Babanov keiin saiasi qyzmetin doǵaratyny jáne parlament depýtaty mandatynan bas tartatyny týraly málimdegen.
Biyl 9 tamyzda Ómirbek Babanov Máskeýden Bishkekke oralǵan.
