Qyrǵyzstan memlekettik ulttyq qaýipsizdik komiteti (MUQK) burynǵy prezident Qurmanbek Bakievtiń qyzmeti jaily eldegi keibir telearnalar kórsetken filmge bailanysty málimdeme jasady, - dep habarlaidy Azattyqtyń Qyrǵyz qyzmeti. Komitettiń baspasóz qyzmeti taratqan habarlamada mundai is-áreketterge jol berýge bolmaityny týraly eskertý aitylǵan.
"Bul jariialanym men televiziialyq materialdar avtorlary óz isi men onyń saldaryn tolyq túsinip turǵan joq. Osyǵan bailanysty komitettiń avtorǵa qoǵamda shielenis týdyrýy yqtimal áreketterge jol berýge bolmaityny týraly eskertý jasaýǵa quqyǵy bar" delingen habarlamada.
MUQK buǵan deiin Qurmanbek Bakiev pen onyń týystaryna aýyr jáne asa aýyr qylmystar jasaǵan degen aiyptar taǵylyp, sot úkimi shyqqanyn eske salǵan. Qazir aiyptalýshylardyń barlyǵyna izdeý jariialanǵan. Olardyń arasynda 2010 jyly 7 sáýirde bolǵan oqiǵalarǵa, kisi óltirý, jemqorlyq jáne reiderlikke bailanysty taǵylǵan aiyptar bar. Sot aiypty dep tanyǵandardyń barlyǵyna izdeý jariialanǵan.
30 shildede Qyrǵyzstandaǵy NewTV jáne NurTV telearnalary eldiń burynǵy prezidenti Qurmanbek Bakievtiń qyzmeti týraly derekti film kórsetken. Áleýmettik jeli qoldanýshylardyń bir bóligi ony "Bakievti aqtaýǵa tyrysý" dep baǵalaǵan. Buǵan deiin Azattyqtyń Qyrǵyz qyzmetine burynǵy prezidenttiń týystary 1 tamyzda 70 jasqa tolatyn Qurmanbek Bakievtiń mereitoiy qurmetine derekti film ázirlenip jatqany jaily aitqan edi.
Qyrǵyzstanda 2010 jyly 7 sáýirde jappai narazylyq kezinde turǵyndar prezident Qurmanbek Bakievti elde otbasylyq-klandyq basqarý ornatty dep aiyptap, qyzmetinen taidyrǵan. Halyq tolqýynan seskengen Bakiev sol kezdegi Qazaqstan Prezidenti Nursultan Nazarbaevtyń buiryǵymen ózin áketýge kelgen ushaqqa minip, shetelge qashqan.
Qyrǵyzstan soty Qurmanbek Bakievti 2010 jylǵy sáýir oqiǵasy kezinde qurban bolǵandardyń qazasyna aiypty dep tanyp, ony 30 jylǵa bas bostandyǵynan aiyrý týraly syrttai úkim shyǵarǵan. Sáýir oqiǵasy kezinde keminde 87 adam qaza taýyp, ondaǵan azamat jaralanǵan.
Bakiev qazir Belarýste turyp jatyr. Ol ózine taǵylǵan aiypty moiyndamaidy.
