18 tamyzda Qaraǵandy oblystyq Politsiia departamentiniń qyzmetkerleri Ulytaý oblysy Jańaarqa aýdanyna qarasty Qyzyljar eldi mekeninde sońǵy birneshe jyl ishinde atalǵan eki oblys aýmaǵynda Qyzyl kitapqa engen kiikterdi zańsyz atýmen ainalysqan qylmystyq toptyń múshelerin ustady, - dep habarlaidy "Ult aqparat" Polisia.kz saityna silteme jasap.
Top músheleri merzimdi túrde kiikterdi atyp, múiizderin Qytai Halyq Respýblikasyna jóneltý maqsatynda ońtústik óńirge satyp otyrǵan. Olar qylmystyq jolmen alynǵan kiik múiiziniń bir kelisin 80-100 myń teńge aralyǵynda satqan.
"Qazirgi ýaqytta politsiia qyzmetkerleri alty ret tintý jumystaryn júrgizip, qylmystyq toptyń úsh múshesi (34 pen 46 jas aralyǵynda) ustaldy jáne úsheýine izdeý jariialandy. 150 keli, iaǵni 732 dana kiik múiizi tárkilendi. Sondai-aq, kúdiktilerden tarazy, pyshaq sýyq qarýy, tirkelmegen qarý jáne avto-mototehnika tárkilenip alyndy", - dep habarlady Qaraǵandy oblystyq Politsiia departamenti bastyǵynyń orynbasary Ábil Ábildin.
Atalǵan derek boiynsha QR Qylmystyq kodeksiniń 339-1-babyna (Ósimdikterdiń nemese janýarlardyń sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan túrlerimen, olardyń bólikterimen nemese derivattarymen zańsyz ainalysý) sáikes qylmystyq is qozǵaldy. Atalǵan baptyń sanktsiiasy múlkin tárkilei otyryp, 3 jyldan 5 jylǵa deiin bas bostandyǵynan aiyrýdy kózdeidi.
Tergeý áreketterimen Qaraǵandy oblystyq Politsiia departamenti tergeý basqarmasynyń tergeýshileri ainalysyp jatyr.
