Qazaqstandyq prodiýser jáne kásipker Qydyráli Bolmanov qolónershi Yrza Tursynzadanyń ǵimarat týraly daýly málimdemesine jaýap berdi, dep habarlaidy QazAqparat tilshisi.
2018 jylǵy 22 maýsymynda Yrza Tursynzada Qydyráli Bolmanov pen Qaraqat Ábildinany Astanadaǵy Mailin kóshesinde ornalasqan ǵimaratty zańsyz iemdendi dep aiyptaǵan bolatyn.
Bolmanovtyń aitýynsha, daýly ǵimarat kommýnaldyq nysan bolyp tabylady jáne ony balalar mektebine yńǵaily oryn retinde quziretti organdar taǵaiyndaǵan.
«Bir jarym jyl buryn memlekettik-jekeshelik áriptestik aiasynda mektep ashý týraly ákimdikke hat jazylǵan bolatyn. Bul mektepte oqý aqysyn tóleý múmkindigi joq balalar oqidy. Olardyń keibiri naýqas, biraq talantty, eń bastysy óner úirenýge yntaly balalar. Osylaisha, elýden astam bala oqýǵa jazyldy. Biraq, mekteptiń ózi jalǵa alynǵan, ondaǵy 25 muǵalimge jalaqy tóleý kerek. Balalardyń teń jartysyn tegin oqyta almaǵandyqtan, memlekettik-jekeshelik áriptestik aiasynda ákimdikten tómen baǵada ǵimaratty jalǵa alýǵa ótinim bildirdik. Qazirdiń ózinde 30 balany tegin oqýǵa qabyldap qoidyq, olardyń arasynda naýqas, ata-anasyz qalǵan nemese áleýmettik jaǵdaiy tómen balalar bar», - dedi Qydyráli Bolmanov Astanada ótken baspasóz máslihatynda.
Qydyráli Bolmanovtyń qorǵaýshysy Amanbol Ábeýov barlyq zańdy qujattardy kórsetip, zańsyz turǵyndardyń uzaq ýaqyt boiy bailanysqa shyqpaǵanyn jetkizdi.
Nysandy jalǵa bergen «Astana» áleýmettik-kásipkerlik korporativi 2017 jyldyń jeltoqsan aiynda ǵimaratta turyp jatqan zańsyz turǵyndardy anyqtaý týraly ishki ister organdaryna ótinish jazǵan. Keiinirek, 2018 jyldyń qańtar aiynda Astana qalasynyń Almaty aýdany ákimdigi de politsiiaǵa júgingen. Biraq, ǵimarattaǵy zańsyz turǵyndar anyqtalmaǵan jáne keri bailanysqa shyqpaǵan.
«Astana» ÁKK men «Qaraqat» mektep-stýdiiasyn» basqaratyn «Aisultan Art» kompaniiasy arasynda kelisimshart ornaǵan soń, kompaniia advokattyq keńse jaldaǵan. Advokattyq keńse jinaǵan derekterge sáikes, sot ǵimaratta zańsyz turyp jatqan tulǵalardy májbúrlep kóshirý týraly sheshim qabyldaǵan. Quzyrly organdar da, Qydyráli Bolmanov pen Qaraqat Ábildina da ǵimaratta kimniń turyp jatqanyn anyqtai almaǵan», - dep túsindirdi zańger.
Óz kezeginde Bolmanov quqyqtyq jumystarmen mektep direktory ainalysqanyn, ǵimaratta qolónershi Yrza Tursynzadanyń turyp jatqanyn bilmegenin aitty.
«Yrza apaimen etene aralasqan emespiz, biraq sálemimiz túzý. Jarnamalyq qoldaý suraǵanda da barynsha kómektestik. EKSPO-da úlken kiiz úi tikti, oǵan Qaraqatty kishkentai sábiimen fototúsirilim jasaýǵa shaqyrdy. Sonda Qaraqat úlken kisiniń ótinishin jerge tastamai, qyrqynan shyqpaǵan sábiimen bardy. Yrza apaidyń «Úiime talai keldi, kiiz úiimde fotoǵa tústi» deýi jalǵan. Bul ǵimaratqa kelip kórmegenbiz jáne Yrza Tursynzadanyń qaida turatynyn da bilmegenbiz. Qaraqattyń bes balasy bar, efirlik ýaqyty bar, kóptegen qoǵamdyq jumystarymen ainalysady. Mekteptiń is-qaǵazdaryna múldem aralaspaǵan. Men de kontserttiń sharýalaryna kóńil bólip, quqyqtyq jumystardy advokattyq keńsege tapsyrǵanmyn. Ǵimaratta etnoónerdi nasihattap júrgen Yrza Tursynzadanyń turyp jatqanyn álýmettik korporativ, ishki ister basqarmasy, ákimdik anyqtai almaǵanda, biz qaidan bilemiz? Advokattar men sot oryndaýshylar Yrza Tursynzadanyń kim ekenin tanymaidy, olar zańǵa sáikes óz mindetterin atqarǵan», - dep óz sózin tolyqtyrdy Bolmanov.
Prodiýserdiń aitýynsha, ǵimarattyń aldaǵy taǵdyry áli de belgisiz.
«Bul nysan eshkimniń menshigindegi dúnie emes. Memleket tarapynan jalǵa beriletin ǵimarat. Sondyqtan Yrza apaidyń jasyn syilap, bas tartaiyq, bere salaiyq degen áńgime júrmeidi. Ol kisi de bizge bir aýyz habarlaspastan, jýrnalisterdi jinap alyp, bizdiń tarapqa aiyptaýlardy boratty. Áiel adammen tartyspaiyn, úndemei qoia salaiyn dedim. Biraq eseiip qalǵan ulym áleýmettik jeliden kórip, «Áke, bul ras pa?» dep suraq qoidy. Bizdiń arymyz taza, biz eshkimniń múlkin tartyp alǵan joqpyz. Erterek bilgende bálkim is ońai sheshiler me edi? Otbasymdy qorǵaý úshin, bizge qarsy aitylyp jatqan sózderge toqtaý salý úshin sizderdi jinap otyrmyn», - dedi Qydyráli Bolmanov.
