Koronavirýspen aýyrǵan adamdardyń júike júiesi syr bere bastaǵan. Onyń ústine naýqastardyń 80 paiyzynda D dárýmeni jetispeidi, dep habarlaidy «Qazaqstan» Ulttyq telearnasy.
Mamandar júrgizgen taldaý nátijesinde aǵzadaǵy ózge de virýstardyń belsendiligi artqan. Ásirese, uiqy bezi, qan qysymy, búirek, asqazan aýrýlary siiaqty naýqasta buryn-sońdy bolmaǵan asqynýlar baiqaldy. Bul - nebári 50 adamǵa júrgizilgen taldaýdyń bastapqy nátijesi. Osy postkovidtik sindromdy zertteý jobasyn jýyrda ulttyq kardiohirýrgiia ortalyǵynyń mamandary qolǵa alǵan edi.
Postkovidtik joba arqyly diagnostikadan ótip júrgenderdiń biri Ainagúl Júsipova. Koronavirýsty 4 ai buryn juqtyrǵan. Saldaryn áli kórip júr. Virýstan keiin basqa aýrý túrleri asqynyp ketken. Buryn múlde bolmaǵan qan qysymy jii kóterilip, júikesi syr berip, uiqysyzdyq mazalaidy.
«Koronavirýstan keiin asqazanym aýyrdy. Asqazanymnan keiin davleniiam kóterildi. Keiin qorqynysh stress paida boldy. Qazir meni mazalaityn uiqysyzdyq. Qobaljý. Endi sol aýrýlar boiynsha em qabyldap jatyrmyn», - deidi qala turǵyny Ainagúl Júsipova.
Jobaǵa qatysýǵa 50-ge jýyq adam niet bildirgen. Tekserýdiń alǵashqy kezeńiniń nátijesine sáikes, denede gerpes, tsitomegalovirýs, Epshtein Barr virýstarynyń belsendiligi artqany anyqtaldy. Bul - qan qurylymy men ishki organdardy zaqymdaityn ziiandy virýstar. Saldarynan arteriialdy gipertenziia, búirek, asqazan-ishek joldarynyń aýrýy, uiqy bezi, sozylmaly aýrýlar asqynǵan. Ásirese, júike júiesi aýrýlaryna shaǵym kóp.
«Koronavirýsten qorqý, jaǵymsyz jańalyqtardy jaqyn qabyldaý, ólip qalam ba degen ýaiym. Munyń bári miǵa jinalyp, kóp adamdarda júike aýrýlary paida bolǵan. Uiqysyzdyq, sharshaý, streske berilýdiń saldarynan aǵzada ózge aýrýlardyń asqynýy baiqalyp jatyr», - deidi Ulttyq ǵylymi kardiohirýrgiialyq ortalyǵynyń psihoterapevti Ǵaliia Muqataeva.
Aýrýy asqynǵan patsientterdiń eń jasy 30-da. Uiqysyzdyq pen álsizdikke shaǵymdanǵan. Al eń úlkeni 83-tegi qariia. Ol sozylmaly aýrýy syr bergenin aitady. Arnaiy jasaqtalǵan dárigerlik quram osy naýqastarǵa tiisti emshara júrgizbek.
«Jobanyń negizgi maqsaty - naýqastardyń densaýlyǵyn ońaltý. Qazir naýqastardan klinikalyq, biohimiialyq analizder alyp, qan qurylymyn zerttep, aǵzadaǵy virýstyń kontsentratsiiasyn anyqtap, patogendi florany tekserýdemiz. Sol nátijeler arqyly indettiń saldaryna zertteý júrgizip, analiz jasap, emdeý mehanizmin meńgerýdi kózdeimiz», - deidi Ulttyq ǵylymi kardiohirýrgiialyq ortalyǵy «Postkovidtik sindrom» jobasynyń zertteýshi-dárigeri Ainur Táýekelova.
Postkovidtik sindromdy zertteý shetelde bar tájiribe. Ǵylymi jobany elordadaǵy ulttyq kardiohirýrgiialyq ortalyǵy da usynyp, birneshe meditsinalyq mekeme qoldaý tanytqan.
