Amerikalyq ǵalymdardyń Qazaqstanda koronavirýstan 80 myń adam qaitys boldy delingen deregi asyra kórsetilgen. Bul týraly QR Densaýlyq saqtaý birinshi vitse-ministri Marat Shoranov aitty, dep habarlaidy QazAqparat.
«Shynymen de Meditsinalyq kórsetilimder jáne baǵalaý institýty (AQSh) ǵalymdarynyń biriktirilgen ólim-jitim týraly habarlamasy boldy. Olar koronavirýs infektsiia pandemiiasy kezeńinde biriktirilgen ólim-jitim boiynsha gipotezany testileýdi júrgizgen. Jalpy, ǵalymdar ózderiniń jumysynda málimetterdi óńdeýdiń túrli ádisterin qoldanatyndyǵyn, derekter negizinde «teoriialyq gipoteza» túzetindigin túsinemiz. Alaida, búginde ony tekserý múmkin emes. Eń aldymen atalǵan institýttan Qazaqstanǵa da, Densaýlyq saqtaý ministrligine de saýal kelip túspegendigin atap ótkim keledi», - dedi birinshi vitse-ministr Ortalyq kommýnikatsiialar qyzmetindegi baspasóz máslihaty barysynda.
Sonymen qatar ólim-jitimdi qosyp kórsetý álemniń barlyq elderine tán ekendigin jasyrmady.
«Tolyqtai alǵanda zertteýdiń búkil álem osy problemamen betpe-bet kelgendigi týraly aitqanymen kelisýge bolady jáne biriktirilgen ólim-jitim bizdiń elge ǵana emes, barlyq, tipti damyǵan memleketterge de tán. Jalpy, atalǵan zertteýdegi elimizde bir jyldyń ishinde shamamen 80 myń ólim-jitim qosyldy delingen derek tym asyra kórsetilgen. Bizdiń málimetterge sáikes, ótken jyly shamamen 28 200 jaǵdai tirkeldi», - dedi Marat Shoranov.
