Kvazimemlekettik sektor úshin komplaens-qyzmetter qurý mindetti boldy. Bul týraly QR Sybailas jemqorlyqqa qarsy is-qimyl agenttigi tóraǵasynyń keńesshisi Anar Jarova aitty, dep habarlaidy QazAqparat.
«2017 jyly sybailas jemqorlyq qylmysy úshin Bilim jáne ǵylym ministrliginiń vedomstvolyq baǵynysty kompaniialarynyń biriniń basshysy sottaldy. Osyǵan qaramastan, bul adam kvazimemlekettik uiymnyń basshysy laýazymynda jumysyn jalǵastyra otyryp, basqa da birqatar sybailas jemqorlyq qylmystaryn jasaǵan. Olardy biz qazir tekserip jatyrmyz. Osy adammen eńbek qatynastaryn ýaqtyly toqtatqan jaǵdaida, memleketke ziian keltirý túrindegi saldarmen bailanysty jaǵdaidy boldyrmaý múmkin edi. Bul turǵyda ótken jyldyń jeltoqsanynan bastap memlekettik jáne kvazimemlekettik sektor basshylarynyń qaramaǵyndaǵy qyzmetkerlerdiń sybailas jemqorlyq quqyqbuzýshylyqtar jasaýynyń aldyn alý mindeti engizilgenin eske salǵan jón», - dedi A. Jarova onlain brifingide.
Onyń aitýynsha, kvazimemlekettik sektorda sybailas jemqorlyq kórinisteriniń aldyn alý maqsatynda Agenttik korporativtik adaldyq standarttaryn saqtaýǵa jaýapty komplaens-qyzmetter institýtyn engizýge bastamashylyq jasady.
«Osy jyldyń 17 qazanynan bastap zańnamalyq deńgeide mundai institýt engizildi. Tiisti túzetýler «Sybailas jemqorlyqqa qarsy is-qimyl týraly» Zańǵa engizildi. Kvazimemlekettik sektor úshin bul norma mindetti. Jeke kompaniialar ózderiniń qalaýy boiynsha komplaens-qyzmetter qura alady, mundai quqyq olarǵa zańmen bekitilgen. «Samuryq-Qazyna «UÁQ» AQ, «Zerde» holdingi, «QTJ» AQ siiaqty birqatar iri kompaniiada buryn komplaens jumys istedi. Bizdiń ustanymymyz – kvazimemlekettik kompaniialarda komplaens-qyzmetterdiń qurylýy men tiimdi jumys isteýine qol jetkize otyryp, bul jumysty odan ári jalǵastyrý», - dedi A. Jarova.
