Destrýktivti dini aǵymdarmen kúresýdiń naqty jáne qatal sharalaryn qabyldaý qajet. Bul týraly senator Áli Bektaev málimdedi, dep habarlaidy Sputnik Qazaqstan.
"Biylǵy jyl elimiz úshin kúrdeli ahýalmen bastaldy. Halyqtyń áleýmettik-ekonomikalyq jaǵdaiǵa bailanysty beibit sherýin qylmystyq jáne destrýktivti aǵymdaǵy toptar óz múddelerine paidalanyp ketti. Arty tragediiaǵa ulasyp, jazyqsyz jandar zardap shekti. Bul oqiǵa halyqqa da, bilikke de úlken sabaq boldy", - dedi Bektaev senattyń jalpy otyrysynda.
Senator jappai tártipsizdikter kezinde buzaqylarǵa ergenderdiń basym bóligi jastar bolǵanyn erekshe atap ótti. Osynyń ózi jastar saiasaty salasyndaǵy olqylyqtyń bar ekenin kórsetip otyr.
"Sonda qai jerden qatelestik? Osyǵan deiin jastar saiasaty úshin bólingen qarjy men tógilgen terdiń nátijesi qaida? Rasymen, sol jumystyń bári naýqanshylyqqa jol berip, alaýlatyp-jalaýlatyp ótkizgen bir kúndik sharalarmen shektelgeni me? Ashyǵyn aitý kerek, qasiretti qańtar elimizdegi ulttyq ideologiianyń aqsap turǵanyn da anyq kórsetti", - dep atap kórsetti Bektaev.
Onyń aitýynsha, bar jaýapkershilikti ata-anaǵa arta salý durys emes. Sebebi keibir ata-ana úshin balasyna bútin kiim men isher asyn taýyp berý, iaǵni, kúnkóristiń ózi ońai emes. Ondaida balańdy otanshyl rýhta tárbiele dep talap qoiýdyń ózi ábestik.
"Jyl basynda bolǵan oqiǵalarǵa destrýktivti dini uiymdardyń qatysy bar ekendigi anyqtalyp otyr. Qoǵamda birneshe jyldan beri aitylyp, talqylanyp kelse de, bul máselege qatysty qatań sheshimder qabyldanbai keledi. Esesine bizdiń dástúrli dinimizdi, imamdardy, memlekettik qurylymdardy moiyndai bermeitin, ózi de, sózi de basqa, júrisi de, turysy da bólek adamdar kóbeidi. Olardyń nemen ainalysyp júrgenin eshkim bilmeidi. Tipti, quzyrly organdardyń ózderi sharasyzdyq tanytady", - dedi Bektaev.
Senator dini ahýaldy baqylaýǵa alyp, ruqsat etilmegen destrýktivti dini aǵymdarmen kúresýdiń naqty jáne qatal sharalaryn qabyldaý qajettigin jetkizdi. Úkimetke depýtattyq saýal joldaǵan Bektaev jastar arasyndaǵy jumyssyzdyqqa qatysty jalǵan statistikany joiýǵa úndedi.
