Qýyrshaq teatry ár bala úshin erekshe. Barlyq adam kishkentai kezinde kem degende bir ret qýyrshaq teatryna barary sózsiz. Biz bala kezimizde qýyrshaqty qolǵa kiip oinatsa, qazir bul teatr zamanaýi baǵytqa ózgergen. Teatr akterlarynyń ózi balanyń kóńilin sahnadan tabýǵa tyrysady. Solai ár balaǵa qýanysh syilai alatyn akter, Almaty Memlekettik qýyrshaq teatrynyń maitalman ónerpazy, Mádeniet salasynyń úzdigi Baqytjan Shadiiarbekuly Qaiýov 50 jasqa tolyp, sahnadaǵy 25 jyldyq shyǵarmashylyǵyna arnalǵan kesh ótkizdi, dep habarlaidy Ult.kz.
Qýyrshaq teatrynyń sahnasynda ótken erekshe kesh barysynda kórermender óner sheberiniń uzaq jyldar boiǵy shyǵarmashylyq jolyn baǵalap, qundy týyndylary men sahnalyq sheberligin tamashalady.
Baqytjan Qaiýov – qýyrshaq teatrynyń kórnekti artisi, ónerdiń bul túriniń damýyna kóp úles qosyp kele jatqan tulǵa. Ol óz mansabyn teatr ónerinde qýyrshaqtardy tiriltýmen bailanystyryp, balalar men eresekterge arnalǵan kóptegen spektaklderde basty rólderdi somdap keledi. Benefis keshi onyń shyǵarmashylyq jolynyń shejiresi, sahnadaǵy eseli eńbeginiń aiǵaǵy boldy.
Baqytjan Qaiýov – qýyrshaq teatrynyń sahnasynda ózindik erekshe qoltańbasyn qalyptastyrǵan talantty artist. Onyń óner joly qazaq qýyrshaq teatry óneriniń damýyna qosqan zor úlesimen erekshelenedi. Baqytjan Shadiiarbekuly sahnalyq sheberligimen ǵana emes, sonymen qatar qýyrshaqtardy jandy beinege ainaldyra biletin tereń talǵampazdyǵymen de tanymal. Onyń qatysýymen sahnalanǵan spektaklder kishkentai kórermender men olardyń ata-analary, eresek teatr súier jandar men kásibi teatr mamandarynyń júrekterine jol taba bildi.
«Baqytjan Qaiýov – qýyrshaq júrgizý óneriniń naǵyz maitalmany. Ol ár keiipkerge jan bitirip, qýyrshaq arqyly kórermendi kúldirtip te, jylatyp ta, tereń oiǵa jetelei alady. Bul – sahnadaǵy shynaiylyq pen sheberliktiń úilesimi. Ol tek sahna sheberi ǵana emes, shyǵarmashylyqtyń túrli salalarynda ózin tanytyp júrgen jan. Ekranda túrli filmderde boi kórsetýi, jańa ideialar usyný, jas artisterdi baýlý – bári de Bákeńniń shyǵarmashylyq qabiletiniń sheksiz ekendiginiń dáleli. Osyndai daryn ieleriniń arqasynda qýyrshaq teatry tek óner túri ǵana emes, tárbielik máni bar, rýhani azyq syilaityn quralǵa ainalyp otyr. Ár qoiylymdary – kórermen júregine jol tabatyn ómirlik sabaq», – deidi Memlekettik qýyrshaq teatrynyń direktory Almat Amangeldi.
Benefis keshke Almaty qalasy ákimdiginiń, Almaty qalasy Máslihatynyń, «Amanat» partiiasy Medeý aýdandyq filialynyń, Qazaqstan teatr qairatkerleri odaǵynyń, Qazaqstan teatr synshylar birlestiginiń, Astana qalasy Qýyrshaq teatrynyń jáne Alataý dástúrli óner teatrynyń ókilderi qatysyp mereitoi iesine aqjarma aq tilekter men ystyq lebizderin arnap, arnaiy syi-siiapattaryn tabystady. Sondai-aq, M.Áýezov atyndaǵy Qazaq ulttyq drama teatry, Ǵ.Músirepov atyndaǵy Qazaq memlekettik akademiialyq balalar men jasóspirimder teatry, S.Qojamqulov atyndaǵy Ulytaý oblysynyń qazaq mýzykalyq-drama teatry, B.Rimova atyndaǵy Taldyqorǵan drama teatry, Aqtóbe oblystyq «Alaqai» qýyrshaq teatry, Mańǵystaý oblystyq qýyrshaq teatry, Qazaq memlekettik tsirkiniń ujymdary arnaiy quttyqtaý hattaryn joldady.
«Baqytjan Qaiýov – qýyrshaq teatry sahnasyndaǵy jarqyn tulǵa, jan-jaqty daryn iesi. Ol óz ónerimen qýyrshaqqa jan bitirip, árbir qoiylymda erekshe áserlilik pen shynaiylyq tanytady. Onyń sheberligi tek tehnikalyq qimyldarda ǵana emes, qýyrshaq arqyly kórermenge tereń emotsiialar men maǵynaly oi jetkizýde aiqyn kórinedi. Akterdiń erekshe daryny onyń árbir róline tolyqtai ený qabiletinde. Ol keiipkerdiń minezin, sezimin, tipti ishki qaishylyqtaryn da qýyrshaq arqyly sheber jetkizedi. Árbir qoiylymynda ol keiipkerdiń beinesin kórermen janyna jaqyn ári túsinikti etip jetkizetindei erekshe energetikamen óner kórsetedi. Kásibi deńgeii onyń repertýardy tańdaýdaǵy jáne ártúrli janrlardaǵy qoiylymdardy igerýdegi ikemdiliginen baiqalady. Ol balalarǵa arnalǵan kóńildi ári jeńil qoiylymdardan bastap, tereń filosofiialyq oilarǵa qurylǵan kúrdeli spektaklderge deiin sátti oryndap, ártúrli kórermen aýditoriiasyna unai biledi. Baqytjan Qaiýov tek oryndaýshy ǵana emes, qýyrshaq óneriniń damýyna úles qosýshy shyǵarmashyl tulǵa. Onyń árbir jumysy teatr sahnasynyń estetikalyq biiktigin arttyryp, kórermenderge qýyrshaq óneriniń sheksiz múmkindikterin ashyp kórsetedi», – deidi teatrtanýshy Baqyt Nurpeiis.
Kesh barysynda qýyrshaq teatrynyń sahnasynda qajyrly qyzmet etip kele jatqan maitalman artist Baqytjan Shadiiarbekulyn Jergilikti «Rýhaniiat» kásipodaǵy qoǵamdyq birlestiginiń tóraǵasy Islambek Omarov «Eńbek sińirgen qairatker» arnaiy medalimen marapattady.
(Sýretter: Qýyrshaq teatrynyń baspasóz qyzmeti)
