QR Ulttyq qorynan 2022-2024 jyldarǵa kepildendirilgen transfert aiasynda kúsh qurylymdarynyń qaýqaryn kúsheitýge 400 mlrd teńgeden astam qarjy bólinedi, dep habarlaidy QazAqparat.
Májiliste QR Qarjy ministriniń orynbasary Tatiana Saveleva qańtar oqiǵasynda zardap shekken shaǵyn jáne orta biznes sýbektilerin qoldaýǵa bólinetin qarajattyń mólsheri naqtylanǵanyn málim etti.
«Biýdjetti naqtylaý aiasynda kúsh qurylymdarynyń jaýyngerlik ázirligi men jaraqtandyrylýyn arttyrýǵa qosymsha 441 mlrd teńge qarastyrylǵan. Atap aitqanda, qańtar oqiǵalarynyń saldaryn joiýǵa jáne ótemaqy tóleýge jalpy somasy 4,1 mlrd teńgege qarajat baǵyttalatyn bolady. Bul shyǵyndar zardap shekken tehnikany, ǵimarattardy jóndeýge jáne qalpyna keltirýge baǵyttalady. Qazirgi ýaqytta qaza tapqan qyzmetkerlerdiń otbasylaryna qajetti járdemaqy men ótemaqy tólendi. Budan basqa, materialdyq jáne turǵyn úi kómegin óńirler kórsetedi», - dedi vitse-ministr.
Aitýynsha, kúsh qurylymdary ókilderiniń sany men ailyǵyn kóbeitýge 92 mlrd teńge bólinbek.
«Barlyq áleýetti organdardyń arnaiy bólimsheleriniń qyzmetkerleri men áskeri qyzmetshileri úshin eńbekaqy orta eseppen 20-dan 40%-ǵa deiin ulǵaidy. Sondai-aq, IIM, Ulttyq ulan jáne Qorǵanys ministrliginiń arnaiy kólik quraldarymen jabdyqtalǵan arnaiy bólimsheleriniń sanyn arttyrý josparlanǵan. Materialdyq-tehnikalyq bazany tolyqtyrýǵa 91 mlrd teńge bólinedi. Onyń ishinde áskeri-kólik aviatsiiasy parkine 15,5 mlrd teńge bólindi. Qabyldanǵan sharalar qoǵamdyq qaýipsizdik deńgeiin arttyrýǵa, daǵdarys jaǵdailaryna jedel den qoiýǵa jáne tutastai alǵanda kúshtik organdardyń bedelin arttyrýǵa yqpal etedi», - dedi Tatiana Saveleva.
