Qazaqstan Qurylysshylar odaǵynyń basshysy Talǵat Erǵaliev devalvatsiianyń qurylysqa qalai áser etetini týraly pikirin bildirdi, dep habarlaidy QazAqparat.
«Resmi turǵyda qurylys materialdarynyń 54% Qazaqstanda óndirilse, 46%-y shetelden ákelinedi. Is júzinde ishki naryq otandyq úles delinip júrgen 54%-dyń jartysyn ǵana qamtamasyz etedi. Qalǵan jartysyn báribir syrttan ákelemiz. Sondyqtan biz teńge baǵamyna qatty táýeldimiz», - dedi Talǵat Erǵaliev BAQ ókilerine bergen suhbatynda.
Sondai-aq, baspana tapshylyǵyn sheshý úshin úi salatyn jer telimin berý isin ońtailandyryp, jyldamdatý kerek ekenin aitady.
«Jeke turǵyn úi qurylysyna jer telimderin berý isi qazir saiabyrsyp qaldy. Dálirek aitqanda, áli berilip jatyr. Biraq burynǵydan az mólsherde. Men Shyǵys Qazaqstan oblysynda jáne basqa da óńirlerde boldym. Jer berilip jatyr, biraq qazirgi qarqyny halyqtyń suranysyn óteýge múlde jetkiliksiz. Shartty túrde aitsaq, bireý kezinde 10 ga satyp alyp, endi sony birneshe telimge bólip, satyp otyr deýge bolady. Jeke úi salýǵa jer alýdyń ár qadamy ashyq, túsinikti bolý kerek. Osyndai birizdi rettilik qalyptastyra alsaq, halyqtyń baspanaǵa muqtajdyǵyn sheshýge bolady», - dedi Talǵat Erǵaliev.
