QR Premer-Ministri Asqar Mamin qurylys materialdary baǵasynyń negizsiz ósýin boldyrmaý boiynsha shara qabyldaýdy tapsyrdy, dep habarlaidy QazAqparat.
«Qurylystyń joǵary qarqyny – qurylys materialdaryna qajettilikti arttyrady, olarǵa jumsalatyn shyǵynnyń úlesi tutas qurylystaǵy shyǵynnyń shamamen 50 paiyzyn quraidy. Osyǵan orai baǵanyń negizsiz ósýine jol bermeý jáne naryqta qatań baqylaýdy qamtamasyz etý boiynsha shuǵyl sharalar qabyldaý óte mańyzdy. Sondyqtan búgin usynylǵan sharalardy jalpy qoldai otyryp, myna máselelerge toqtalǵym keledi», - dedi A. Mamin búgingi Úkimet otyrysynda.
Eń aldymen Premer-Ministr qurylys kompaniialary men otandyq qurylys materialdaryn óndirýshiler tarapynan spekýliativtik áreketterge jol bermeý qajettigin aitty.
«Básekelestikti qorǵaý agenttigi Indýstriia ministrligimen jáne ákimdiktermen birlesip, josyqsyz óndirýshiler men ónim berýshilerge qatysty qatań sharalar qabyldaýy qajet. Ekinshiden, ofteik-kelisimsharttar da baǵanyń turaqtylyǵyn qamtamasyz etýdiń tiimdi quraly bola alady.
Qazirgi ýaqytta Úkimet qurylys salýshylarmen keiinnen turǵyn úidi belgilengen baǵamen satyp alýǵa offteik-kelisimsharttar tetigin engizip jatyr. Indýstriia ministrligine Ulttyq kásipkerler palatasymen birlesip, qurylys salýshylar men qurylys materialdaryn óndirýshiler arasynda uzaq merzimdi satyp alý kelisimsharttaryn jasaýdy pysyqtaýdy tapsyramyn», - dedi Úkimet basshysy.
Sonymen birge, A. Mamin otandyq qurylys materialdaryn odan ári damytý naryqty qoljetimdi materialdarmen tolyqtyrýdyń mańyzdy aspektisi ekenin eske saldy.
«Jańa óndirister qurý, eskilerin jańǵyrtý qurylys shyǵyndaryn aitarlyqtai azaitýǵa múmkindik beredi. Indýstriia ministrligine ákimdiktermen jáne «Atameken» kásipkerler palatasymen birlesip, qurylys salasynda import almastyrý boiynsha josparlanǵan jobalardy ýaqytynda iske qosýdy tapsyramyn. Roman Vasilevich (QR Premer-Ministriniń orynbasary Roman Skliar – red.) jalpy baqylaý sizge júkteledi», - dedi Asqar Mamin.
