2025 jylǵa qarai Qurylys materialdarynyń import úlesin 42-den 27 paiyzǵa deiin azaitylady. Bul týraly Úkimet otyrysynda Premer-Ministr Asqar Mamin málim etti, dep habarlaidy QazAqparat.
«Álemde infliatsiia deńgeiiniń joǵary bolýyna jáne qurylys materialdarynyń qymbattaýyna bailanysty Úkimet ákimdiktermen birge otandyq qurylys materialdarynyń óndirisin damytý boiynsha naqty sharalardy iske asyryp jatyr. Biylǵy jyly quny 76 mlrd teńge bolatyn qurylys materialdaryn óndirý boiynsha 34 iri joba iske asyryldy, 2,2 myńnan astam jumys orny quryldy. Osyndai sharalardyń aiasynda qurylys materialdary óndirisinde joǵary serpin baiqalyp otyr», - dedi A. Mamin.
Onyń aitýynsha, 11 aidyń qorytyndysy boiynsha ósim 9,2 paiyzdy qurady.
«Naryqty qoljetimdi otandyq qurylys materialdarymen qamtamasyz etý úshin 2025 jylǵa qarai quny 1 trln teńgeden asatyn qurylys indýstriiasynyń 165 jańa jobasy iske asyrylady. Keńinen qoldanylatyn qurylys materialdarynyń óndirisi uiymdastyrylady, onyń ishinde shyny, keramika taqtashalar, sanfaians, qasbet jáne jylý saqtaityn materialdar jáne taǵy basqa. Bul 2025 jylǵa qarai import úlesin 42-den 27 paiyzǵa deiin azaitady. Jańa óndirister qurý jáne jumys istep turǵandaryn jańǵyrtý qurylys materialdarynyń qoljetimdiligin qamtamasyz etedi jáne jalpy import úlesin azaitýǵa múmkindik beredi. Jalpy bul jumysty belsendi túrde jalǵastyrý qajet», - dedi Úkimet basshysy.
