Qazaqstan prezidenti Nursultan Nazarbaev Bes áleýmettik bastamada baspana máselesin nelikten birinshi orynǵa qoiǵanyn túsindirdi. Sondai-aq, Elbasy atalǵan bastama aiasynda arzan ipotekany aldymen jas otbasylarǵa berý kerektigin aitty, dep habarlaidy Baq.kz tilshisi.
«Bes áleýmettik bastama - bul qarapaiym halyqqa qatysty bes mańyzdy áleýmettik máseleni sheshý joly. Assambleia músheleri ózge de qazaqstandyqtar sekildi osy baǵdarlamanyń mazmunyn biledi. Sondyqtan, tek qaǵidatty tustaryn atap óteiin. Birinshi bastama - úii joqtarǵa baspana alýdyń jańa múmkindikterin ashyp, turǵyn úi ipotekasynyń qoljetimdiligi máselesin sheshedi. Jaqsy ómir súrý baǵytynda baspananyń qanshalyqty mańyzdy ekenin bilemiz. Osy baǵdarlamany sondyqtan da birinshi orynǵa qoidym. Jańa sharttar boiynsha ipoteka alý múmkindigine ár jumys istep júrgen qazaqstandyqtyń ie bolýy asa mańyzdy. Biz bárin eseptedik. 50-60 sharshy metrlik eki bólmeli páterdi alyp, ipoteka arqyly tóleý úshin eki adam jumys istese otbasynyń biýdjetine az júkteme túsedi. Iaǵni, olar 25 jyldyq ipotekany tólei alady. Buǵan qosa, alǵashqy jarna burynǵydai 50 paiyz emes, 20 paiyz bolady. Bul bizdiń milliondaǵan turǵyndarymyz úshin jasalyp otyr. Ásirese, jas otbasylar jumys atqaryp, osy baǵdarlama arqyly baspana ala alady», - dep Memleket basshysy birinshi bastama jaily aityp berdi.
Elbasy atalǵan bastama aiasynda «7-20-25» arzan ipotekasyn aldymen jas otbasylarǵa berýdi de usyndy.
«Baspana aldymen kimge kerek? Árine, jas otbasylarǵa. Mine, osy sanattaǵy azamattar kóbirek úi alsyn. Basqalar da bar. Eń bastysy, ipotekanyń merzimi burynǵydai 5-10 jyl emes, 25 jyl bolady. Sosyn, qurylys kompaniialary turǵyn úilerdiń baǵasyn túsirýi tiis. Sonda qaryz alǵan adamnyń nesiesi de jeńildeidi», - dedi Nursultan Nazarbaev.
