Mańǵystaýda Táýelsizdik kúni qarsańynda Quryq jaǵalaý aimaǵynda «Abai» manevrlik bazasy ashyldy, dep habarlaidy "Ult aqparat" Qarakiia aýdany ákimdiginiń baspasóz qyzmetine silteme jasap.
Saltanatty sharaǵa Mańǵystaý oblysynyń ákimi Serikbai Trumov qatysty. Aldymen eskertkish taqtany tabystaý men ashylý rásimi ótti. Keiin áskeri - teńiz týy kóterildi. Is-sharada kemeler sherýi uiymdastyryldy.
Atalǵan manevrlik ornalasý pýnkti 800 tonnaǵa deiingi jiyntyq sý yǵystyrǵyshtyǵy bar, katerlerdi jáne kemelerdi arqandap bailaýǵa, turaqtandyrýǵa jáne olarǵa qyzmet kórsetýge, kemege elektr energiiasyn óndirýge jáne berýge, tyldyq qamtamasyz etýge jáne Kaspii teńiziniń ońtústik bóliginiń Memlekettik shekarasyn qorǵaý boiynsha kemeler jáne katerlerdiń tiimdi jumysyn qamtamasyz etý úshin tieý-túsirý jumystaryn júrgizýge arnalǵan.
Aimaq basshysy Táýelsizdik kúni qarsańynda ashylǵan nysanmen quttyqtap, oǵan ultymyzdyń uly aqyny Abaidyń esimi berilýi elge qýanysh, sarbazdarǵa aibyn, urpaqqa ulaǵat bolaryn aitty.
«Elimiz táýelsizdik alǵan jyldardan beri áskeri teńiz kúshteriniń áleýeti artyp, materialdyq-tehnikalyq bazasy da nyǵaiyp keledi. Ulttyq qaýipsizdik komiteti qaramaǵyndaǵy jaǵalaý kúzeti sońǵy jyldary birneshe ret jańa korablder men katerlermen tolyqqanyn bilesizder. Tolqyny týlaǵan teńizde qýatty qurylymdarmen qarýlanǵan sarbazdarymyz árqashan saýysqandai saq, qyrandai qyraǵy bolsyn!»-dedi oblys ákimi.
