Delide (Úndistan) kúres túrlerinen ótip jatqan Aziia chempionatynda el qorjynyna áielder kúresinen alǵashqy júlde tústi, dep habarlaidy "Ult aqparat".
Atap aitsaq, áielder kúresinen 50 keli salmaqta el namysyn qorǵaǵan Valentina Islamova qola medal úshin ótken kezdesýde vetnamdyq qarsylasyn 10:0 esebimen utyp, úzdikter qatarynan kórindi.
Sondai-aq, búgin taǵy úsh balýan qyzymyz qola medal úshin synǵa túsedi. Olar - 55 kelidegi Marina Zýeva, 59 kelide Mádina Baqbergenova jáne Elmira Syzdyqova.
Aita keteiik, keshe grek-rim kúresiniń sheberleri jarysty aiaqtap, búgin áielder arasyndaǵy báseke bastalǵan bolatyn. Grek-rim balýandary qurlyq dodasyn bes medalmen aiaqtady. Onyń bireýi - altyn, bireýi - kúmis jáne úsheýi - qola medal. Nátijesinde jalpy esepte 136 upaimen úzdik úshtikten kórindi.
Aziia chempionatynda 190 upai jinaǵan Iran quramasy kósh bastasa, ekinshi oryndy 146 upai enshilegen Ózbekstan quramasy jeńip aldy.
