Elordada kúres túrlerinen ótetin álem chempionatynda 104 eldiń 1000-nan astam balýany Tokio Olimpiadasynyń joldamalaryn sarapqa salady. Bul týraly «Barys-arena» stadionynda ótken baspasóz-máslihatynda aityldy.
Áielder kúresinen bas bapker Giýzel Maniýrova Tokioǵa joldama alý balýan shákirtteri úshin ońai bolmaitynyn aitady.
«Árine, osynsha daiyndaqtan ótkendikten, medalden úmittimiz. Ol úshin balýandarǵa barlyq jaǵdai jasaldy. Áielder kúresi boiynsha ereje ózgerdi. Básekeles elderdiń qatarynda jańa memleketter paida boldy.Sondyqtan bári jerebege bailanysty. Jerebe sátti tússe, medal de bolady. Bizdiń sanat boiynsha da Tokioǵa 16 litsenziia ǵana berilgen. Iaǵni, litsenziia alý óte qiyn. 1-2 litsenziia alsaq ta jaman kórsetkish bolmaidy. «Úide» kúresýdiń óz artyqshylyqtary bar», dedi bapker.
Grek-rim balýandarynyń aldyna júktelgen mindetter týraly QR grek-rim kúresiniń vitse-prezidenti Dáýlet Turlyhanov aitty.
«Elordaǵa kelgen balýandar kúrestiń úsh túri boiynsha 10 salmaq sanatynda baq synaidy. Onyń ishinde ár kúres túrinen Olimpiada oiyndaryna kiretin alty salmaq sanaty bar. Bul álem chempionaty 2020 jyly Tokio qalasynda ótetin jazǵy Olimpiada oiyndaryna joldama úlestiredi. Mindet – sol oiyndarǵa kóbirek litsenziia alý. Grek rim kúresinen álem chempionatynan altyn almaǵynymyzǵa 20 jyldan asypty. Chempionat júldesi jaily aitsaq, bes medal alamyz degen úmitimiz bar. Al Olimipiada litsenziiasyna keler bolsaq, bapkerler quramynyń aldyna keminde 3 joldama alý mindeti júktelip otyr», - dedi Dáýlet Turlyhanov.
QR erkin kúres federatsiiasynyń vitse-prezidenti Erlan Qojasbai atalmysh kúres túrinen de 3 joldama alý josparlanǵan aitady.
«Erkin kúresten álem chempionatynda altyn alyp kórmegenbiz. Eń úlken jetistigimiz finalǵa shyǵý ǵana eken. Biyl óz kilemimizde sol kemshiliktiń orynn toltyrsaq degen niet bar. Degenmen, qazir kúresten altyn alý qiyn. Álem chemiponatynda 10 «altyn», Olimpiada 6 «altyn» sarapqa salynady. Tokiodaǵy Olimpiadaǵa 16 joldama ǵana bólinip otyr. Sondyqtan, joldama alýdyń ózi ońaiǵa túspeitin siiaqty», - dedi federatsiia ókili.
