Qoǵam belsendisi Dáýren Seiitjanuly ádilet pen aqiqat suraityn ál-dármendi keiinge saqtap, dál qazir qarǵyn sýmen jumyla kúresý keregimizdi jazdy.
Ol keýildi kúiretetin jaǵdaiattardy jipke tize bergenniń jóni joq ekenin aitady. Bolǵan is boldy, tabiǵat óz degenin jasady, deidi ol.
"Qulqynquldardyń kesapaty jańa Qazaqstanǵa da tidi. Bizdiń qoǵamnyń syn saǵattarda judyryqtai jumyla ketetini bar. "El-jer bizdiki" dep qarǵyn sýmen kúreske jeń túrgenderdi kózimiz kórip otyr. Qai oblys ekenin bilmeimin, Aqtoǵai degen aýyldyń adamdary bala demei, shaǵa demei, óz kúshterimen bóget jasap jatyr eken. Osy kórinistiń ózi boiǵa qýat, júrekke shýaq syilaidy eken. Biraq solai eken dep qarap otyrýǵa bolmaidy, qazir olarǵa naqty kómek kerek, bizdiń ókpemizdi óshke ainaldaryp otyrǵanymyzdan paida joq", - dep jazdy ol.
Aitýynsha, dál qazirgi jaǵdaida bizge el úshin eriktiler sapyna qosylatyndai erik, erteńgi kúnnen kúder úzdirmeitin jiger kerek. Jáne bul turǵyda eshkim qalys qalyp jatpaǵanyn aitty.
"Qarjy uiymdary, alyp kompaniialar da qareket jasaýda. Mýftiiat ókilderi de aiaǵynan tik turyp, qaltqysyz qyzmet qylyp jatyr. Oǵan biz, búgingi halyqshyl qoǵam bolyspasa, demeý bolmasa, bári beker", - deidi ol.
Dáýren Seiitjanuly “Ádilet she, aqiqat she, halyqty ábirge salǵandardyń jazasy she?” deitin suraqtarǵa da ýaqyt óte kele jaýap tabylatynyn aitady.
"Ádilet búgin de, erteń de ádilet, adam ózgergenimen, adam taǵdyry ózgergenimen aqiqat ózgermeidi. Ol bir ǵasyrdan keiin de aqiqat. Al, qarǵyn sý, topan sý kidirmeidi. Sol úshin birigeiik, aǵaiyn!
Jalǵyz shańyraǵy, jalǵyz baspanasy sý astynda qalǵan, talai jylǵy eńbegin sý shaiǵan jandardyń boiyndaǵy úreidi birligimizben jeńip, dem bereiikshi!
Kovidti da, kóp itti de kórdik, sol kezeńderde bizdiń sanamyzdy sansyratqan "anaý anadai eken", "mynda sondai bolyp jatyr" degen qańqý sózder edi. "Berekeni sybys buzady" degen, qazir de qaýesetter aragidik aitylyp qalyp jatyr. Sondyqtan aqyl tarazymyzǵa salyp otyraiyq. Alǵashqy kúnderdei emes, búgingi tańda resmi aqparattardy berý jolǵa qoiyldy. 24 saǵat úzilissiz habar berilip jatyr.
Sý tartylar, jer qurǵar. Báriniń esebin suraityn ýaqyt keler. Ádilet pen aqiqat suraityn ál-dármenimizdi sol ýaqytqa saqtaiyq. Kúressek, bul kúnderdi de ótkeremiz!", - dep jazdy qoǵam belsendisi.
