Elorda tórinde kúres túrlerinen ótip jatqan litsenziialyq Álem chempionatynyń jetinshi jarys kúni bastalady. Búgin erkin kúres balýandary 70, 74, 92 jáne 125 kelide ózara myqtyny anyqtaidy, dep habarlaidy "Ult aqparat".
Aita keteiik, keshe áielder kúresinen 62 jáne 68 keli salmaqtaǵy, erkin kúresten 57 jáne 65 keli salmaq dárejesindegi finalister anyqtalǵan bolatyn. Búgin atalǵan sanattaǵy balýandar júldeli oryndardy sarapqa salady.
Sondai-aq, keshe áielder kúresinen 57, 59, 65 jáne 76 kelide chempiondar men júldegerler esimi belgili boldy.
Álem chempionatynyń altynshy kúni qazaq balýandary úshin tabysty boldy desek te bolady. Sebebi, keshe balýandarymyz Tokio Olimpiadasyna bir emes, úsh birdei joldama jeńip aldy.
Atap aitar bolsaq, áielder kúresinen 76 keli salmaqtaǵy Elmira Syzdyqova, erkin kúresten erler arasynda 57 kelide el namysyn qorǵaǵan Nurislam Sanaev jáne 65 keli salmaq dárejesinde Dáýlet Niiazbekov Olimpiada joldamasyna ielik etti. Sonyń ishinde Niiazbekov finalǵa shyǵyp, jankúierlerin bir jelpindirip tastady. Endi búgin ol Álem chempionatynyń «altyny» úshin synǵa túsedi.
Kúres túrlerinen Álem chempionatynyń 20 qyrkúiek kúngi jarys kestesi tómendegidei:
11.00-16.00 – erkin kúresten 70, 74, 92 jáne 125 keli salmaq dárejesindegi irikteý ainalymy;
11.00-16.00 - áielder kúresinen 62 jáne 68 keli, erkin kúresten 57 jáne 65 keli salmaq dárejesindegi jubanysh beldesýleri;
16.45 – 17.45 - erkin kúresten 70, 74, 92 jáne 125 keli salmaq dárejesindegi jartylai finaldyq básekeler;
18.00-21.00 - áielder kúresinen 62 jáne 68 keli, erkin kúresten 57 jáne 65 keli salmaq dárejesindegi finaldyq beldesýler jáne marapattaý rásimi.
