Búgin elorda tórinde kúres túrlerinen ótip jatqan álem chempionatynda el namysyn qorǵaǵan tórt balýan qyzymyz da qarsylastarynan utylyp qaldy, dep habarlaidy QazAqparat.
Búgin áielder kúresinen 57, 59, 65 jáne 76 keli salmaq dárejelerindegi irikteý ainalymy ótken bolatyn. 57 keli salmaqta Emma Tisina, 59 keli salmaqta Mádina Baqbergenova, 65 keli salmaqta Aina Temirtasova jáne 76 kelide Elmira Syzdyqova synǵa túsken edi. Ókinishke qarai, tórteýi de alysqa bara alǵan joq.
Emma Tissina kúres túrlerinen álem chempionatynyń 1/16 finalynda Majarstannyń ókili Emisa Barkpen kezdesip, 0:9 esebimen utylyp qalsa, Mádina Baqbergenova 1/8 ainalymda qytailyq Ksing Peiden 0:10 esebimen jeńildi. Al Aina Temirtasova 1/8 ainalymda reseilik Inna Trajýkovadan 2:13 esebimen jol berdi. Sondai-aq, medaldan basty úmitker balýandarymyzdyń biri Elmira Syzdyqova 1/8 finalynda amerikalyq Adelin Mariia Greeige 0:10 esebimen ese jiberdi.
Endi, búgingi keshki sessiiada 50, 53, 55 jáne 72 keli salmaq dárejesinde chempiondar men júldegerlerdiń esimderi belgili bolady. Onyń ishinde 55 kelide el namysyn qorǵaǵan Marina Sedneva, 72 kelide synǵa túsken Jámila Baqbergenova jáne 50 keli salmaqta beldesken taǵy bir balýanymyz Valentina Islamova qola medal úshin beldesedi.
