Túrkiia men AQSh arasyndaǵy kelisimge qaramastan Siriia soltústiginde túrik áskerileri men kúrd jasaqtary arasynda soǵys jalǵasyp jatyr. Buǵan deiin Túrkiia Prezidenti Rejep Erdoǵannyń AQSh vitse-prezidenti Maik Penspen kezdesýinen keiin Ankaranyń áskeri operatsiiany toqtatýǵa keliskeni jaily habar taraǵan.
Reuters pen jergilikti jýrnalisterdiń jazýynsha, qaqtyǵys Túrkiiamen shekaradaǵy Ras-el-Ain qalasynda júrip jatyr. Kúrdter túrik áskerilerin kelisim sharttaryn buzyp, turǵyn úilerdi atqylady dep aiyptady. Ázirge zardap shekkender sany aitylmady.
Túrkiia Prezidenti Rejep Erdoǵan juma kúni Siriia soltústiginde soǵys toqtaǵanyn málimdegen.
17 qazanda Ankaradaǵy kelissózden keiin AQSh vitse-prezidenti Maik Pens áýeli atys 120 saǵatqa toqtaidy degen. Osy ýaqyt ishinde kúrd jasaǵy Túrkiia shekarasyndaǵy 30 shaqyrymdyq aimaqtan ketýi tiis bolǵan. Bul shartty kúrdter synaǵanmen beibit rejimdi saqtaýǵa kelisken.
AQSh Prezidenti Donald Tramp Erdoǵandy atysty toqtatýǵa keliskeni úshin maqtady. Biraq naqty qai aýmaqta atysty toqtatý rejimi saqtalýy tiis ekeni túsiniksiz. Túrkiia Efrat ózeninen bastap Irak shekarasyna deiingi 30 shaqyrym bólikti baqylaýǵa alýdy kózdep otyr.
Qazir túrik jasaqtary bul aýmaqtyń kishigirim bóligin ǵana baqylaidy. Qalǵan bóligi kúrdter nemese olarmen kelisken Siriia úkimeti áskerine qaraidy.
