Ait merekesiniń birinshi kúni Qazaqstanda 40 myńnan astam otbasyǵa et taratyldy, dep habarlaidy "Ult aqparat" Qazaqstan musylmandary dini basqarmasyna silteme jasap.
«Qazaqstan musylmandary dini basqarmasynyń qoǵam aldyndaǵy negizgi 4 qyzmetiniń biri – qaiyrymdylyq sharalaryn uiymdastyrý. QMDB kómekke muqtaj jandardy qoldaý, qaýipti indettiń aldyn alý maqsatynda biyl taǵy da qashyqtan qurban shalýdy qolǵa alyp, WWW.QURBAN2021.KZ saityn iske qosqan bolatyn. Joba maqsaty – qaiyrymdylyqqa dáneker bolý, halyqtyń densaýlyǵy men ómirine tóngen qaýipti seiiltýge úles qosý, qurban shalýǵa niet bildirgen jandarǵa karantin jaǵdaiynda ońtaily jol usyný», - delingen QMDB habarlamasynda.
Qurban aittyń alǵashqy kúnindegi málimet boiynsha respýblika deńgeiinde qurban2021.kz saity arqyly 2 132 adam qurbandyq shalýǵa tapsyrys berse, elimiz boiynsha jalpy sany 7 670 mal shalynǵan.
«Onyń ishinde 6740 qoi, 603 iri qara, 318 eshki, 9 túie bar. Barlyq málimetti jinaqtap aitqanda, elimiz boiynsha 40 156 otbasyǵa qurbandyq eti taratyldy. Halqymyzda «Qaiyrymdylyq jasasań, qaiyryn óziń kóresiń» degen naqyl sóz bar. Barshańyz shynaiy nietpen qurban shalyp, muqtaj otbasylarǵa merekelik qýanysh syilap, saýapty iske ortaqtasyp otyrsyzdar. Kómek alǵan jandardyń sizderge joldaǵan duǵa-tilekteri qabyl bolǵai. Jaratqan Jabbar Iemiz mereilerińizdi ústem etip, eki dúnieniń nyǵmeti men qurmetine bólenýdi násip etkei. Ámin!», - dep habarlady dini basqarma.
Aita keteiik, 2021 jyly qurban shalý rásimi eki jolmen júzege asyrylady. Birinshi joly: memlekettik sanitarlyq-epidemiologiialyq qadaǵalaý organdary tarapynan ruqsat berilgen jergilikti qasaphanalarda sanitariia erejelerin qatań saqtai otyryp «sary» jáne «jasyl» aimaqtarda onlain jáne oflain formatta ótkizý. Ekinshi joly: elimizdiń «qyzyl» aimaqtarynda qurban shalý rásimi qurban2021.kz saity arqyly tek onlain rejimde ótkizý.
