Biyl quny 860 mln AQSh dollarlyq gaz óńdeý zaýytynyń qurylysy bastalady. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«Biyl Qashaǵan ken ornynyń shikizaty bazasynda qýaty 1,150 mlrd tekshe metr shiki gazyn, quny 860 mln AQSh dollaryn quraityn gaz óńdeý zaýytynyń qurylysyn bastaý josparlanyp otyr. Bolashaqta ony jylyna 4-5 mlrd tekshe metrge deiin odan ári keńeitý qarastyrylýda», - dedi ministr.
Onyń atap ótýinshe, atalǵan jobany iske asyrý nátijesinde – qosymsha 800 mln tekshe metr taýarlyq gaz óndirilip, zaýyt qurylys kezeńinde 2 800, paidalaný kezeńinde 600 adamǵa jańa jumys oryndary ashylady.
«Osy zaýyt aiasynda munai-gaz himiia úshin baǵaly shikizat sanalatyn taýarlyq jáne suiytylǵan gazdyń qosymsha kólemi alynady. Búgingi tańda jobalyq-smetalyq qujattamaǵa memlekettik saraptamanyń oń qorytyndysy alyndy jáne Engineering Procurement Construction merdigeri anyqtaldy. Jumys kúshin jumyldyrý, irgetas aýmaqtaryn daiyndaý júrgizilýde. Zaýyttyń qurylysyn aiaqtaý 2023 jyldyń sońyna josparlanyp otyr», - dedi Nurlan Noǵaev.
