Almatyda dúnie júzindegi túrli kinofestivalderde 50-ge jýyq júldemen marapattalǵan «Kúnbaǵys» filminiń tusaýkeseri ótti. Kinotýyndyny QR Mádeniet jáne sport ministrliginiń tapsyrysy boiynsha «Qazaqfilm» kinostýdiiasy «Stalker Sinema» kompaniiasymen birlesip túsirgen, dep habarlaidy QazAqparat.
«Kúnbaǵys» — «orta jas» daǵdarysyna ushyraǵan otbasy týraly dramaǵa toly hikaia.
Ishki qaishylyqtarymen áýre bolǵan ata-ananyń qaraýynsyz qalǵan jasóspirim bala úide de, mektepte de «býllingtiń» barlyq sumdyqtaryn bastan keship, shettetilgen adamǵa ainalady.
Pana izdegen Ámir qumar oiynǵa táýeldilikke ákeletin kompiýter oiyndary álemine enedi...
Mádeni shara barysynda sóz sóilegen filmniń qoiýshy rejisseri Elia Gilman tusaýkeserge kelgen kórermenge alǵysyn aita otyryp, kartinanyń kinofestivalderdegi jetistikterimen bólisip, kinotýyndynyń túsirý tobyna júldelerin tabystady.
Osylaisha rejisser Istanbul Film Awards jáne Cannes Film Awards kinofestivalderinde marapattalǵan «Úzdik akter» juldesin filmde basty rólderdiń birin somdaǵan akter Erkebulan Daiyrovqa tabystady.
Sondai-aq basqa da júldelerdi filmniń jas akteri Rashid Mýsin, stsenarii avtory Rasýl Shybyntai, operator Aleksei Kiriýhin, qoiýshy sýretshi Oksana Azamatova, prodiýserler Gúlsina Mýstafina men Aleksandr Gilman aldy.
Aita ketsek, jalpy alǵanda osy kúnge deiin «Kúnbaǵys» dramasy 27 halyqaralyq kinofestivalde túrli nominatsiialar boiynsha 47 syilyqty qanjyǵasyna bailady.
Filmde basty rólderdi somdaǵan reseilik akter Kirill Kiaro jáne serbiialyq aktrisa Sloboda Michalovich atalǵan is-sharaǵa qatysa almaǵandyqtan, beine jazba arqyly áriptesterin tusaýkesermen quttyqtap, sáttilik tiledi.
Kórsetilimniń aldynda rejisser Elia Gilman bul filmdi túsirýge dostarynyń otbasynda oryn alǵan qaiǵyly jaǵdaidyń túrtki bolǵanyn aitty.
- Dostarymyz uldarynan aiyrylyp qaldy. Bul oqiǵa maǵan qatty áser etip, nátijesinde osy film dúniege keldi. Bul oqiǵa – meniń barlyq ata-analarǵa joldaýym, men siiaqty óz balalaryn tárbielep otyrǵan, búkil álemdegi analar men ákeler meni túsinedi dep úmittenem. Jasóspirim bolý, erejeler qysymyna qarsy turý qiyn. Biz balalarymyzǵa jaqyn bolyp, olardy jaqsy kórý úshin qoldan kelgenniń bárin jasaýymyz kerek, - dedi rejisser Elia Gilman.
Sondai-aq rejisser «Kúnbaǵys» filmi keler jyly sáýir aiynda prokatqa shyǵatynyn habarlady.
