Almaty Politsiia departamenti Tergeý basqarmasynyń aǵa tergeýshisi, politsiia podpolkovnigi Sániia Mustafina qyzmet babynyń qiyndyqtary jaiynda aityp berdi, dep habarlaidy QazAqparat.
Politsiia podpolkovnigi ishki ister organdarynda qyzmet etip júrgenine 18 jyldyń júzi bolǵan.
Osy mamandyqqa bala kezinen qyzyǵýshylyq tanytqan.
«2002-206 jyldary QR IIM Akademiiasynda bilim aldym. 2006 jyly oqý bitirisimen Almaly aýdandyq PB anyqtaý bólimine jumysqa turdym. Politsiianyń qyzyǵy men shyjyǵy mol qyzmetinde júrgenimde «qańǵyǵan» oq tiip anyqtaý bóliminen aýystym. 4 aiǵa sozylǵan emnen soń tergeýshi bolyp jolymdy bastadym. Negizi, bala kezimnen armanym – tergeýshi bolý edi», - dedi Sániia Mustafina.
Keiipker politsiia qyzmetine názik jandylar mineziniń qattylyǵynan nemese bilikke umtylystan kelmeitindigin aitady. Eń aldymen, adamgershilik, ádilettilik ornatýdy maqsat tutatynyn jetkizdi. 18 jylda Sániia túrli qylmystyq oqiǵalardy kórgen, olardy ashýǵa, aiyptylardy tabýǵa tyrysqan.
«Byltyr týǵanyna 40 kún bolǵan balasyn satqan áieldi ustadyq. Adamnyń amoraldy ómir súrýine barshylyq nemese joqshylyq áser etpeidi eken. Oǵan taǵy da kózim jetti. Áiel óte baqýatty otbasynan shyqqan. Isher as, kier kiimnen kende bolmaǵan. Alaida, qyz kúninen úiinen ketip, syrtta júrip bala týǵan. Ol balany ata-anasy baǵyp alǵan. Bir-eki jyldan soń taǵy úiden bezedi. Keiin syrtta júrip ekinshi balasyn týady. Sol balany áiel satpaqshy bolǵan. Ustaý kezinde oqiǵa ornyna bardyq. Saraptama taǵaiyndadym. DNQ test júrgizdik. Bala men anadan epitelii alyndy. Sol túni bala jetimder úiine rásimdeldi. Men neshe túrli zorlyq, adam ólimi degen siiaqty qylmysty kórdim. Biraq, myna jaǵdaida eshkimge keregi joq Bala saýdalaǵanda kóz jasyma erik berdim – politsiia podpolkovnigi Sániia Mustafina
Sániianyń tájiribesinde asa aýyr qylmystar da bolǵan.
«Biyl 2 er adam bir adamdy qasaqana óltirip, «trofei» retinde saýsaǵyn kesip alǵan. Osy qylmysty teksergende barynsha muqiiat bolýǵa tyrystyq. Saraptama taǵaiyndap, olardyń júrisin video arqyly baqyladyq. Kýágerlerdi izdedik. Nátijesinde 4 aiǵa sozylǵan tergeýden soń, eki kúdiktige sot 18 jyldan bas bostandyǵynan aiyrý týraly úkim shyǵardy», - dedi Sániia Mustafina.
Onyń aitýynsha, qyzmet babynyń taýqymetin otbasyna kórsetpeýge tyrysady.
«Biz osy negativti nárselerdi boiymyzdan, júregimizden ótkizbeýge tyrysamyz. Meniń otbasym bar, eki balam bar. Shamam jetkenshe otbasyma da kóńil bólýge tyrysamyn. Joldasym da tergeý basqarmasynda jumys istegen. Qazir – IIM zeinetkeri. Meniń qyzmet babynda jetken jetistikterimniń kópshiligi sol kisiniń arqasy. Balalarym da biz siiaqty ata jolyn qýyp, tergeýshi bolamyz deidi», - dedi S.Mustafina.
Politsiia podpolkovnigi jas leitenanttarǵa mamandyǵyn qaltqysyz súiýge keńes berdi.
«Bizdi bul mamandyqta ustap turatyn birinshi kezekte – ádilettilik, qylmysqa tózbeýshilik, adamgershilik siiaqty úlken qasietter. Eger osy qasietter bolmasa, basqasynan paida joq. Óz mamandyqtaryńyzdy súiińizder», - dedi ol. Kólikte otyryp kóz jasyma erik berdim», - deidi S.Mustafina.
