"Sháken Aimanov atyndaǵy "Qazaqfilm" AQ jaryqqa shyǵarǵan "Qunanbai" filmi Ýfa qalasynda qazannyń 26-y men 28-i aralyǵynda ótken "Kúmis Aqbozat" atty III Halyqaralyq ulttyq jáne etnikalyq kinofestivalinde Ámir Ábdirazaqov atyndaǵy "Ulttyq rýh" júldesimen marapattaldy", - dep habarlaidy "Ult aqparat" "Qazaqfilm" AQ baspasóz qyzmetine silteme jasap.
"Qunanbai" filmi - ataqty dala kemeńgeri, qaradan shyǵyp han atanǵan Uly Abaidyń ákesi - Qunanbai Óskenbaiulynyń ónegeli ómiriniń bir kezeńin qamtidy. Kartinanyń rejisseri Qazaqstannyń Halyq artisi, Memlekettik syilyqtyń iegeri, qazaq mádenietiniń kórnekti qairatkeri, óner ardageri Doshan Joljaqsynov.
"Shyǵarmashylyq toptyń filmdi túsirerdegi maqsaty: halqymyzdyń qundylyqtaryn dáripteý arqyly, jastardyń boiynda ulttyq rýhty oiatý boldy. Endi mine, búginde eńbegimizdi baǵalanyp jatyr. Kartinany túsirýge atsalysqan túsirý tobyn osy jeńispen quttyqtaimyn", - dedi filmniń rejisseri Doshan Joljaqsynov.
Esterińizge sala ketsek, "Qunanbai" tarihi kórkem filmi byltyr qyrkúiek aiynda prokatqa shyqqqan. Osy jyldyń qyrkúiek aiynda Reseidiń Lipetsk qalasynda ótken XII Halyqaralyq musylman kino festivaliniń negizgi baiqaýynda kórsetilgen bolatyn.
Al 30 qyrkúiekte "Eýraziia" kinofestivali sheńberinde atalmysh film Ulttyq kinematografiia óneri jáne ǵylymy akademiiasy taǵaiyndaǵan "Tulpar" ulttyq kinojúldesimen marapattaldy. Basty róldi somdaǵan akter Doshan Joljaqsynov "Eń úzdik er adam róli" júldesimen, filmniń kompozitory Tólegen Muhamedjanov "Filmniń eń úzdik mýzykasy" júldesimen, al kartinanyń qoiýshy sýretshisi Rýstam Odinaev "Eń úzdik sýretshi-qoiýshy jumysy" júldesimen marapattaldy. Sonymen qatar, marqum Talasbek Ásemqulov jáne Doshan Joljaqsynov jazǵan filmniń stsenarii úzdik dep tanyldy.
Halyqaralyq "Kúmis Aqbozat" kinofestivali álem halyqtarynyń rýhani jáne mádeni qundylyqtaryn nasihattaýǵa, ulttyq jáne etnikalyq baǵyttaǵy filmderdi túsirýshi kinematografister shyǵarmashylyǵyn dáripteýge, Resei aimaqtary jáne sheteldermen mádeni qatynasty damytý úshin arnaiy jasalǵan. Kinofestival Ýfa qalalyq okrýgi ákimdiginiń qoldaýymen Bashqurtstan úkimeti men Bashqurtstan Respýblikasynyń mádeniet ministrligi, "Bashqurtstan" kinostýdiiasynyń uiymdastyrýymen ótedi.
