Májilismen memleket pen qoǵam arasynda kelisim bolýy tiis ekenin aitty.
"Shaǵyn jáne mikrobiznes dami bersin. Iia, olar salyq tóleýi kerek. Mysaly, búginde Ashyq-syz eshkim jumys istemeidi. Biraq nege POS terminaldary joq? Men qarjy ministri men búkil vedomstvonyń nazaryn osy olqylyqtarǵa aýdarǵym keledi. Naqty qai jerden salyq izdeý keregin bilýi kerek", - dedi ol.
Paiaev "Samuryq-Qazynany" mysalǵa keltirdi.
"Samuryq-Qazyna" - tapsyrys berýshi. Olardyń kóptegen tiimsiz jetkizýshisi bar. Osydan mynandai suraq týyndaidy: shyǵynyn ótei almai otyrǵan kásiporyndar ulttyq kompaniiamen qalai kelisimshart jasai aldy? Kompaniia men jetkizýshiler arasyndaǵy barlyq shartty ashyq etip jasaiyq, qandai kompaniialarmen jumys isteitinin, qai jerde tirkelgenin, jumys oryndaryn qamtamasyz etetinin kóreiik. Olar ne óndiredi jáne ne jetkizedi? Salyqty qalai tóleidi? Mine, naǵyz salyq tóleýshilerdi osyndai jerlerden izdeý kerek!" - dep qosty depýtat.
Qazaqstan halyq partiiasy ókiliniń pikirinshe, satý salyǵyn engizgen durys.
"Satý salyǵyn engizeiik. Kóptegen oligarh top buǵan qarsy, barlyǵy qosylǵan qun salyǵymen qaitarýdy qalaidy. (...). Úlken bizneske ǵana emes, bárine birdei qaraiyq. Sonda halyq zańdy túrde tóleýge yntalanady. Ministr nelikten osyndai tetikterdi qarastyrmaidy?" - dedi Paiaev.
Depýtat jii júrgiziletin tekserýler qazaqstandyq biznestiń damýyna keri áserin tigizedi dep esepteidi.
"Men úzdiksiz tekseris biznesti óltiretinin bilemin. Qazir pandemiia kezinde bir kásiporyndar jumys isteidi, bireýi istemeidi. Túsiniksiz. Muny qalai retteýge bolady? Halyqpen kelisimge otyrý kerek. Maǵan senińiz, kelisim bolsa barlyq kásipker salyq tóleýge daiyn, bastysy bitpeitin tekseristerdi qoiý kerek. Biz naryqtyq ekonomikada ómir súrip jatyrmyz", - dedi májilismen.
QHP depýtatynyń pikirinshe, keibir vedomstvo kóleńkeli ekonomikamen kúres boiynsha jetkiliksiz jumys júrgizip jatyr.
"Kóleńkeli ekonomikamen eshkim ainalyspaidy - MKK de, qarjy monitoringi da. Búginde Qarjy ministrligi aqshanyń qaida ketetinin tolyq suraýǵa jáne bilýge quqyly. Biraq bul jasalmaidy. Pandemiia kezinde biznesti qoldaý kerek, tekserýmen ainalyspaý kerek", - dedi depýtat.
Aibek Paiaev joldaýynda ulttyq kompaniialardyń shyǵynǵa batýyna nazar aýdarǵan Prezidenttiń sózin eske saldy.
"Prezident, kompaniialar shyǵynǵa batsa, olardy jabý kerek dedi. Mundai kásiporyndardyń basshylary toqtyqtan qutyryp júrgenin kórip otyrmyz. Endeshe salyqty kásiporynnan emes, jeke tulǵadan alǵan jón. Ol milliarder, jyl saiyn Forbes-ke kiredi, biraq qazynaǵa aqsha ákelmeidi. Bailar úshin salyq jasaiyq, biýdjetke 10 paiyzyn berip otyrady. Óitkeni, Qazaqstanda barlyǵy baiyp jatyr. Nelikten qarjy ministrligi mundai máselelerde tártip ornata almaidy? Bul absýrd", - dep túiindedi Paiaev.
Buǵan deiin qarjy ministri Erulan Jamaýbaev shaǵyn biznesti tekserýge ruqsatty qaitaryp, moratoriidi alyp tastaýdy suraǵan bolatyn. Sheneýniktiń aitýynsha, bul memlekettik biýdjet kiristeriniń ulǵaiýyn qamtamasyz etýge múmkindik beredi.
