QR parlamenti májilisiniń depýtattary Qýanysh Sultanov pen Artýr Platonov S.Toraiǵyrov atyndaǵy PMÝ ujymymen kezdesti, dep habarlaidy pavlodarnews.kz.
Ýniversitet qyzmetkerleri men stýdentteri qatysqan kezdesýde halyq qalaýlylaryna Elbasynyń bes áleýmettik bastamasy jóninde suraqtar qoiyldy. QR parlamenti májilisiniń halyqaralyq ister, qorǵanys jáne qaýipsizdik komitetiniń múshesi Qýanysh Sultanov áleýmettik bastamalar jobalarynyń daiyndalý barysy jóninde aityp ótti.
"Ertis óńirine attanardyń alynda Úkimettiń otyrysy ótti. Otyrysqa Ulttyq Bank ókilderi de qatysty. Qazir halyqtyń kókeiinde Elbasynyń bastamalary jónindegi suraqtar kóp ekeni belgili. Sondyqtan arnaiy bilip kelgenbiz. "7-20-25" jobasynyń erejesi mamyr aiynda halyqqa jariialanady. Joba negizinen jastardyń baspanaly bolýyna baǵyttalǵan. PMÝ "Elektr energetikasy" kafedrasynyń meńgerýshisi Vadim Markovskii depýtattarǵa atalmysh jobaǵa ekinshi naryqtaǵy páterlerdiń engizilý barysy týraly saýal joldady", — dedi Qýanysh Sultanov.
Kafedra meńgerýshisi Vadim Markovskiidiń "7-20-25» jobasyna ekinshi naryqtaǵy páterler engizile me?" degen saýalyna QR parlamenti májilisiniń ekologiia máseleleri jáne tabiǵatty paidalaný komitetiniń múshesi Artýr Platonov jaýap berdi.
"Ulttyq bank ókilderine osy másele jóninde saýal qoidym, — dedi Artýr Platonov. – Mamyrda olar júieni retke keltiredi. Joba arqyly muqtaj turǵyndar qamtamasyz etilý kerek. Joba daiyndyq barysynda bolǵandyqtan ekinshi naryqtaǵy páterler máselesi mindetti túrde qaralady. Bul halyqqa barynsha jaǵdai jasaýǵa arnalǵan. Ázirge birinshi naryqtaǵy úilerdi kirgizedi. Óitkeni qurylys salasyn damytý kerek. Bizde elimiz 90 paiyz qurylys materialdarymen qamtamasyz etilgen. Taǵy atap óterligi, nesiege ilikkender qaryzyn ýaqytynan buryn jabýǵa bolady. Ol úshin qosymsha tólem bolmaidy".
Artýr Platonov sonymen qatar bilim ordasynyń 4-kýrs stýdenti Ánel Sadýovanyń bilim granttary týraly qozǵaǵan máselesine pikir bildirdi.
"Qosymsha 20 myń granttyń 11 myńy tehnikalyq mamandyqtarǵa bólinedi", — dedi Artýr Platonov. – Qalǵan mamandyqtar qur qalady degen sóz emes. Bilim jáne ǵylym ministrligi ár óńirdegi suranysqa bailanysty bólinetindigin aitqan bolatyn. Jańa shyqqan mamandyqtardy ǵana arttyrmai, suranysy men bolashaǵy bar, oqýyn támamdaǵan soń jumysqa tura alatyndai mamandyqtarǵa grant kóbirek bólinedi. Bul durys dep sanaimyz".
Sonymen qatar, májilis depýtattary jinalǵan qaýymnyń qoǵamdaǵy jaǵdailar, saiasi áreketter jónindegi suraqtaryna jaýap berdi.
