QR Aýyl sharýashylyǵy ministri Erbol Qarashókeev qýańshylyqtan zardap shekken óńirlerge qandai kómek kórsetilgenin baiandady, dep habarlaidy QazAqparat agenttigi.
«Elimizdiń batysy men ońtústiginde qatty sezilgen qýańshylyqtan keiingi jaǵdaiǵa qandai baǵa beresizder? Kelesi jyly mundai jait bolmaýy úshin qandai jospar qurylyp, aldyn alý jumystary júrip jatyr?», - degen suraq qoiyldy ministrge Ortalyq kommýnikatsiialar qyzmetinde.
«Rasynda da biylǵy kóktem-jazda eki óńirge ońai bolǵan joq, mal azyǵynyń tapshylyǵynyń sebebi – qysta qar bolmai, kóktemde jaýyn bolmai, shóptiń az bolýy. Sol sebepti biz biyl operativtik shtab quryp, ministrlik tarapynan sol shtabty turaqty túrde ótkizdik, biraz jumys atqaryldy. Búgingi kúni respýblika boiynsha 23,9 mln tonna pishen ázirlendi nemese jospardyń 100 paiyzy daiyndaldy, 1,6 mln tonna pishendeme, 1,4 mln tonna súrlem jáne saban men qunarlandyrylǵan azyqtar da ázirlenip jatyr», - dep jaýap berdi Qarashókeev.
Ministrdiń aitýynsha, Mańǵystaý óńiri boiynsha aýyl sharýashylyǵy maldaryn qystatý úshin 77 myń tonna pishen jáne 53 myń tonna qunarly azyq qajet.
«Ony daiyndaý úshin jospar quryldy, jospar boiynsha 75 paiyz pishen, 55 paiyz qunarly azyq daiyndaldy. Sol sebepti memleket, úkimet rezervinen 3,6 mlrd teńge bólingen edi, sol qarajattan 1,9 mlrd teńge – arnaiy Mańǵystaý oblysyna bólindi. Osy 14 qazandaǵy jaǵdai boiynsha, sol 1,9 mlrd teńgeniń 1,2 mlrd teńgesi igerildi. Búgingi tańda 790 sharýa qojalyǵyna, 7 myńǵa jýyq jeke-qosalqy sharýashylyqtarǵa osy kómek tólendi», - dep túsindirdi spiker.
Al Qyzylorda oblysyna Úkimet rezervinen 1,7 mlrd teńge bólindi, qazirgi ýaqytta bul qarajat 100 paiyz igerilip, 1100 sharýa qojalyǵyna kómek tólendi.
«Odan basqa Mańǵystaý óńirinde «Kaspii» ÁKK arqyly jergilikti biýdjetten de qarajat bólinip jatyr. Ol pishen men qunarly jem daiyndaýǵa jumsalyp, kúzdiń aiaǵyna deiin jem-shóp tolyq kólemde daiyndalady dep jergilikti ákimdik aqparat berdi. Qurǵaqshylyqtan zardap shekken sharýalarǵa aqshadan da basqa kómek kórsetilgen bolatyn. Birinshiden, fermerlerdiń alǵan nesielerin uzartý jumysy júrgizildi, temirjol men azyq-túlik tasý úshin qoldanylatyn tarifter 77 paiyzǵa arzandatyldy, ol tarif qazir de jumys istep tur. Basqa óńirlerden de Mańǵystaý oblysyna jeńildetilgen tarif arqasynda biraz jem-shóp tasylyp jatyr», - dedi ministr.
Strategiialyq sipattaǵy sharalar boiynsha, ministrlik mal azyǵyn óndirisi salasyn damytý boiynsha arnaiy jol kartasyn ázirlegen.
«Jol kartasynyń negizi sátteri – birinshiden, alańdardy jáne tiisinshe azyq daqyldaryn óndirý kólemin ulǵaitý. Ekinshiden, árbir aýyl sharýashylyǵy daqyldaryn, egis alańdaryn ártaraptandyrý josparyn jasaý, ol jospardyń oryndalýyn ákimdiktermen birlesip ózimiz qadaǵalaimyz. Jeńildetilgen kredit berý jáne investitsiialyq sýbsidiialar arqyly jaiylymdardy sýlandyrý infraqurylymyn qurýdy yntalandyrý, oǵan da qarajat bólinetin bolady. Jaiylym ainalymdaryn engizý jáne saqtaý, tamyryn jáne ústińdi betin jaqsartý esebinen jaiylymdardyń ónimdiligin arttyrý, bul da – jol kartasynyń mańyzdy baǵyty.
Iri astyq óndirýshilerdiń iri tutynýshylarǵa, qospa jem zaýyttaryn jáne basqa da kásiporyndardy jem men astyqtyń bir bóligin mindetti túrde satýy normasyn engizeiin dep otyrmyz. Sebebi jem-shóptiń ónim kólemi ishki naryqqa da túsýi kerek. Bul sharalar túptep kelgende mal sharýashylyǵyn damytý turaqtylyǵyn arttyrýǵa jáne osy salanyń kún raiy aýytqýlarynyń táýeldigin barynsha tómendetýge yqpal etedi. Ózimiz de kelesi jyly qiyn bolmaidy dep senip otyrmyz. Strategiialyq jáne qazirgi ýaqytta qajet sharalardyń bárin atqaryp jatyrmyz», - dedi Aýyl sharýashylyǵy ministri.
