- Almatyda terakt uiymdastyrǵan Rýslan Kúlekbaevtyń isine qatysty sot otyrysynda kýáger Tamara Salihova kórgenderimen bólisti, dep habarlaidy sot zalynan QazAqparat tilshisi.
«18 shilde kúni meniń jumys kezegim bolatyn. Men sol jerde aýdandyq ishki ister basqarmasyna (Almaly aýdandyq IIB) qarama qarsy sulýlyq salonynda jumys isteimin. Kúndizgi saǵat 11-00-der shamasynda tars etken dybys shyqty. Kólik dóńgelegi jarylǵan shyǵar dep oiladym. Qarasam, turǵan kólikterdiń bári jyldam ketip jatyr. Terezege qarap edim, tars etken daýys qaita shyqty. Onyń qaidan shyqqanyn bilmedim. Jas jigittiń kiimderi qap-qara boldy. Aýdandyq ishki ister basqarmasynyń aldynda kólik turdy. Ol sol kóliktiń janynan ótkizý-baqylaý beketine (KPP) qarata oq atyp jatty. Ol sosyn beketten ótip, AIIB ǵimaratynyń ishine qarai «Allah akbar!» dep aiqailap kirip bara jatty. Qarýyn aýlada da atyp júrdi. Júgirgen joq. Onda kóp bolmady, 8-9 minýttan soń shyǵyp, asyqpai Vinogradova (Qabanbai batyr-agenttik) Dosmýhambetov kósheleriniń qiylysyna qarai bettedi. Onyń qolyndaǵy qarýdan bárimiz shoshyp kettik. «Bizge jaqyndasa qaitemiz» dedik... Qoryqqanymyzdan atys kezinde bárimiz jerge jata qaldyq. Joldan Baitursynov jaqtan kólik kele jatty, ol soǵan otyryp, tez ketip qaldy», - dedi kýáger Tamara Salihova.
Eske sala keteiik, Almatydaǵy tergeý abaqtysynda Qylmystyq ister jónindegi mamandandyrylǵan aýdanaralyq sotynda Rýslan Kúlekbaevtiń isine qatysty basty sot otyrysynyń ekinshi kúni ótip jatyr. Isti atalǵan sottyń sýdiasy Erlan Bolatov júrgizýde.
