«Qazaqstan temirjoly» ulttyq kompaniiasy jolaýshy poiyzdarynyń nelikten keshigip jatqanyn túsindirdi, dep habarlaidy "Ult aqparat".
«QTJ» UK» AQ temirjoldardyń kúrdeli jóndeýden ótkizilýine bailanysty jolaýshylar poiyzdary qozǵalysynyń kestesi buzylatyndyǵy baiqalatynyn habarlaidy. Sáýir aiynan bastap qozǵalys qaýipsizdigin jáne jolaýshylar men júk poiyzdary jyldamdyǵyn arttyrýǵa baǵyttalǵan, temirjoldardy jańǵyrtý bastaldy. Jumystar shtattyq rejimde, úzdiksiz júrgizilýde. Koronavirýs indetimen kúres sheńberinde qabyldanǵan barlyq qaýipsizdik sharalary eskerilgen», delingen kompaniianyń baspasóz qyzmeti taratqan habarlamada.
«QTJ» keltirilgen yńǵaisyzdyqtar úshin jolaýshylardan keshirim surai otyryp, jumystardyń tezirek aiaqtalýyna qajetti barlyq sharalar qabyldanatynyn habarlady. Sondai-aq kompaniia zańnamada jolaýshy poiyzy keshikkeni úshin aiyppul tóleýi qarastyrylǵandyǵyn eske saldy.
«Temirjol kóligi týraly» Zańynyń 80-baby «Jolaýshyny, bagajdy, júk bagajyn jetkizý merziminiń buzylýyna jaýapkershilik».
Baptyń 3 tarmaǵy - Jóneltýdi ustanǵany úshin, sondai-aq belgilengen temirjol stansasyna jolaýshyny tasymaldaityn jolaýshylar poiyzynyń keshikkeni úshin eger keshigý nemese kidirý belgisiz kúsh saldarynan ekenin dáleldemese tasymaldaýshy jolaýshyǵa ár keshigý ýaqyty úshin jol júrý qujaty (bilet) qunynyń úsh paiyz kóleminde jolaýshy shyǵynyn óteýden basqa aiyppul tóleidi. Óndirilgen aiyppul salý somasy jol júrý qujaty (bilet) qunynan aspaýy tiis.
Tasymal erejesine sáikes jolaýshy aryzy boiynsha jolaýshylar poiyzynyń keshikkeni úshin tólenetin aiyppuldy alý úshin jolaýshy shaǵymdanýy kerek.
«Ótemaqy alýy úshin jolaýshy sońǵy kelý pýnktinde vokzaldaǵy kezekshiden keshikken ýaqyt sany mindetti túrde kórsetilip bekitilgen jol júrý qujatynda (bilette) ustalynǵan ýaqyt sany týraly belgi qoiyp alýy kerek. Ary qarai jolaýshy osy qujatpen, sondai-aq jeke basty kýálandyratyn qujatpen QTJ kez kelgen kassasynan ótemaqy alýyna bolady», delingen habarlamada.
