«Qazaqstan temir joly» kompaniiasy temirjol vokzaly men vagondarda koronavirýstyń aldyn alý jónindegi sharalar týraly málimet taratty, dep habarlaidy "Ult aqparat".
Kompaniia baspasóz qyzmetiniń málimetinshe, qańtar aiynan bastap koronavirýstyń aldyn alý jónindegi erterek áreket etý sharalary qabyldanǵan. Sonymen qatar, 2020 jyldyń 1 aqpanynan bastap Dostyq stansasyna deiin «Almaty – Úrimji» jáne «Nur-Sultan – Úrimji» jolaýshylar poiyzynyń júrý baǵyttary qysqartylǵan.
«Jolaýshy poiyzynda koronavirýstyń aldyn alý jónindegi barlyq júrgizilip jatqan is-sharalar densaýlyq saqtaý salasynyń ýákiletti organy (DSM Taýarlar men kórsetiletin qyzmetterdiń sapasy men qaýipsizdigin baqylaý komiteti) talaptaryna sáikes qatań túrde júrgizilýde.
Nur-Sultan qalasy boiynsha DSM Taýarlar men kórsetiletin qyzmetterdiń sapasy men qaýipsizdigin baqylaý departamentimen birlese jolaýshydan nemese personaldan koronavirýs kúdigi baiqalǵan kezde poiyz brigadasynyń is-áreketin reglamentteitin nusqama ázirlendi», delingen habarlamada.
Reistiń aldynda poiyz brigadalary turaqty túrde nusqaýlyq ótkizedi. Vagonǵa otyrǵyzar aldynda jolserik jolaýshylardyń koronavirýs indeti taraǵan elderde bolǵan-bolmaǵany jóninen surap habardar bolýy kerek. Ondai jolaýshylar anyqtalǵan jaǵdaida anketa toltyrylady jáne aqparat ary qarai sharalar qabyldaý úshin «Jolaýshylar tasymaly» AQ ortalyq apparatyna jiberiledi.
«Sapar barysynda poiyz brigadasy qyzmetkerinde nemese jolaýshyda koronavirýs belgisi anyqtalǵan jaǵdaida poiyz basshysy álgi jolaýshyny ózge jolaýshylardan oqshaýlaýy jáne poiyz mashinisin habardar etýi tiis. Vagondardyń ainalymy jáne kelý pýnkterinde bakteriia men virýstarǵa qarsy zararsyzdandyrý jumysy turaqty júrgizilýde. Qabyrǵa, tóbe, eden, ústel, divan jáne tereze dezinfektsiialanady. Ol sanitarlyq ereje talaptaryna júrgiziledi. Sondai-aq jolaýshylar poiyzy ainalymy pýnkterinde qoqys jáshikteri men dárethanany zararsyzdandyrý qolǵa alynǵan», delingen habarlamada.
«Jolaýshylar tasymaly» AQ jolaýshylar poiyzdarynda kelesidei saqtyq sharalaryn qabyldaǵan:
-Vagondarda jolaýshylar úshin kórneki aqparat jáne jadynama, firmalyq jáne kommertsiialyq poiyzdardyń mýltimediialyq portaldarynda koronavirýstyń aldyn alý jónindegi beinerolikter ornalastyrylǵan.
Sapar kezinde zararsyzdandyrý quraldaryn qoldana otyryp 4 retten kem emes ylǵaldy tazartý júrgiziledi. Poiyzdar aýrý anyqtalǵan jaǵdaida zararsyzdandyrý quraldary, meditsinalyq maskalar jáne ózgeleri (shúberek, shelek, esepke alý dápteri) qarastyrylǵan.
Sonymen qatar «QTJ» UK» AQ Qazaqstan temirjol vokzaldarynda koronavirýs taralýynyń aldyn alýda jáne qaýipsizdik sharalaryn qabyldaýda.
Nur – Sultan, Almaty, Semei qalalaryndaǵy jáne Dostyq stansasy vokzaldaryna erekshe nazar aýdarylýda.
«Atalǵan vokzaldardyń esepshi, kezekshi men ózge de qyzmetkerleri antiseptik, qorǵanysh qolǵaby, maskamen qamtamasyz etilgen. Sondai-aq juqpaly indet belgisi bar tulǵa anyqtalǵan jaǵdaida qaýipsizdik sharasy men ózge de áreket boiynsha qyzmetkerlerge nusqaýlyq ótkizilýde. Elimizdegi vokzaldarda barlyq ǵimarattardy zararsyzdandyrýdy turaqty júrgizýge arnaiy jýý quraldarynyń jetkilikti qorymen qamtamasyz etilgen», delingen habarlamada.
«Jolaýshylar tasymaly» kompaniiasynyń málmetinshe, koronavirýs indeti taralýy kezeńinde josparyn ózgertip, jol júrý qujatyn (biletin) ótkizý týraly sheshim qabyldaǵan jolaýshylar ony bilet satyp alynǵan oryndarda (internet saittary men bilet kassalarynda) júzege asyra alady. Suraý sany artqan kezde biletti keri qaitarý protsesi kútkendegiden kóp ýaqyt alýy múmkin.
