Japoniiada karantinde turǵan krýiz lainerindegi qazaqstandyq jolaýshylar elge qaitýǵa daiyndalyp jatyr, dep habarlaidy "Ult aqparat" Syrtqy ister ministrligine silteme jasap.
Qazaqstannyń Japoniiadaǵy Elshiliginiń aqparatyna sáikes, búgin «Diamond Princess» krýiz lainerinde bolǵan taǵy eki azamatymyz jerge túsirildi.
«Olar qazir Tokio qonaq úileriniń birinde demalýda. Osylaisha, atalmysh lainerde bolǵan bizdiń barlyq azamatymyz koronavirýsty anyqtaityn testiden ótip, virýs juqtyrmaǵany belgili boldy. Olar erteń elge oralady dep kútilýde» delingen habarlamada.
Bizdiń Tokiodaǵy diplomattar lainerde Qazaqstan azamattary bar ekeni belgili bolǵan sátten bastap olarmen turaqty bailanys ornatyp, qajetti barlyq konsýldyq-quqyqtyq kómekti kórsetti.
