Mádeniet jáne sport ministrligi salany damytýǵa baǵyttalǵan «El rýhy» atty ulttyq joba ázirlep jatyr, dep habarlaidy QazAqparat.
Bul týraly Mádeniet jáne sport ministri Aqtoty Raiymqulova el aldyndaǵy esebinde aitty.
Ministr sońǵy kezde kreativti kontent arqyly qazaq mádenietin belsendi tanytyp júrgen qazaqstandyqtardyń kóbeigenin atap ótti.
«Ulttyń, ishki sondai-aq, syrtqy ekonomikalyq jáne áleýmettik kúizelisterine ideologiialyq immýnitet qalyptastyrýda mádeniet missiiasy erekshe mánge ie bolýǵa tiis. Osyǵan bailanysty úzdik halyqaralyq táiribege súiene otyryp ministrlik jergilikti atqarýshy organdarmen birge «El rýhy» ulttyq jobasyn ázirlep bekitedi», - degen vedomstvo basshysy BUU-nyń Bas assambleiasy 2021 jyldy Halyqaralyq turaqty damýdyń kreativti ekonomika jyly dep jariialaǵanyn eske saldy.
«Qazaqstanda sapaly kreativti ónim jasap jatqan azamattar sany artyp keledi. Qazaqstandyqtar mýzyka, kinorejissýra jáne media kontent jasaý siiaqty salalarda erekshe tabys kórsetýde. Jalpy alǵanda kerativti indýstriia el ekonomikasyn damytý úshin ǵana emes, qazaqstandyq mádenietti halyqaralyq ilgeriletýde, jastardyń ózin-ózi tanytý baǵytynda da joǵary áleýetke ie. Búgingi tańda Memleket basshysynyń tapsyrmasy boiynsha «Qazaqstan Respýblikasynda kreativti ekonomikany damytý» tujyrymdamasyn ázirleý boiynsha jumys júrgizilýde. Kreativti indýstriianyń negizgi baǵyttary mádeniet jáne óner salasyn qamtitynyn eskere otyrypy, ministrlik tujyrymdyq tásilderdi ázirleýge belsendi atsalysady», - deidi Mádeniet jáne sport ministri.
