Búgin elordada QR Ulttyq Olimpiadalyq komiteti Bas assambleiasynyń otyrysy ótti. Kún tártibinde UOK-tyń negizgi basqarý organdaryn sailaý máseleleri qaraldy, dep habarlaidy "Ult aqparat" Olympic.kz-ke silteme jasap.
Otyrysqa Qazaqstan UOK prezidenti Timýr Qulybaev, QR Premer-Ministriniń orynbasary Eraly Toǵjanov, sonymen qatar ulttyq sport federatsiialarynyń prezidentteri men ókilderi qatysty.
QR UOK Jarǵysynyń erejelerine sáikes, bas hatshy jáne vitse-prezident laýazymdaryna úmitkerlerdi UOK prezidenti usynady. Osylaisha, Sáken Musaibekov bas hatshy bolyp qaita sailandy. Barlyq vitse-prezidentter de qaita sailandy:
UOK-tyń jalpy máseleler jónindegi vitse-prezidenti Daniiar Abýlǵazin,
UOK-tyń qysqy sport jónindegi vitse-prezidenti Asqar Mamin,
UOK-tyń jazǵy sport jónindegi vitse-prezidenti Ádilbek Jaqsybekov,
UOK paralimpiadlyq sport jónindegi vitse-prezidenti Qairat Boranbaev,
UOK halyqaralyq yntymaqtastyq jónindegi vitse-prezidenti Andrei Kriýkov boldy.
«Ulttyq Olimpiadalyq federatsiialar men Qazaqstan Olimpiadalyq komiteti búginde sporttaǵy barlyq protsesterdiń belsendi qatysýshysy. Úkimettiń qoldaýymen biz ulttyq quramalardy daiyndap, olarǵa materialdyq, tehnikalyq, biomeditsinalyq jáne ońaltý boiynsha qoldaý kórsetýdemiz. Osylaisha, sport kúntizbesindegi sharalar tolyǵymen oryndalýda. Bizdiń aldymyzda UOK-tyń kelesi eki olimpiadalyq kezeńindegi saiasatyn naqty anyqtaityn mańyzdy mindetter tur. Birlesken kúsh-jigerdiń arqasynda ǵana biz ulttyq quramalardy qoldaý men jattyǵýlar júiesiniń tiimdiligin arttyryp, elimizdegi olimpiadalyq qozǵalysty damytýdyń irgeli máselelerin sapaly sheshýdi qamtamasyz etemiz», - dedi jinalysta UOK basshysy Timýr Qulybaev.
Olimpiada komitetiniń basshysy sporttyq meditsinany damytý jáne sporttaǵy dopingke qarsy kúres UOK pen ulttyq federatsiialar jumysyndaǵy mańyzdy baǵyttyń biri bolyp qala beretinin atap ótti.
Atqarý komitetine sport federatsiialarynyń ókilderi retinde kelesi músheler sailandy:
«Qazaqstan voleibol federatsiiasy» RQB prezidenti Nurtai Ábiqaev,
«Qazaqstan Respýblikasy jeńil atletika federatsiiasy» RQB prezidenti Danial Ahmetov,
«Qazaqstannyń qazirgi bessaiys federatsiiasy» RQB prezidenti Berik Imashev,
Qazaqstan Respýblikasy shańǵy tebý ulttyq assotsiatsiiasynyń ZTB prezidenti Dias Súleimenov,
«Aýyr atletika federatsiiasy» RQB prezidenti Janat Túsipbekov,
«Tennis federatsiiasy» RQB prezidenti Bolat Ótemuratov,
«Qazaqstan gimnastika federatsiiasy» RQB prezidenti Úmit Shaiahmetova,
Sportshylar komissiiasynyń tóraǵasy Serik Sápiev.
Sonymen qatar, Qazaqstan badminton federatsiiasynyń prezidenti Ulan Baijanovtyń tóraǵalyǵymen UOK Tekserý komissiiasynyń quramy sailandy. Usynylǵan kandidattardy irikteýge ulttyq federatsiialar ótinish bergennen bastap kandidattardy usynýdyń barlyq protsesterin táýelsiz sailaý komissiiasy Bahtiiar Artaevtyń tóraǵalyǵymen júrgizgenin atap ótken jón. Atqarý komiteti men eldiń negizgi olimpiadalyq departamentiniń Tekserý komissiiasynyń quramy tórt jylda bir sailanady.
