QR Ulttyq qaýipsizdik komiteti Pavlodar oblysynyń ákimi Bolat Baqaýovqa qatysty qylmystyq isti tergep jatyr, dep habarlaidy "Ult aqparat".
«Ulttyq qaýipsizdik komiteti 2020 jylǵy 15 qańtarda Pavlodar oblysynyń ákimi Bolat Baqaýovqa qatysty laýazymdyq ýákilettigin asyra paidalaný faktisi boiynsha QR QK-niń 362-baby 2-bóligi 3-tarmaǵy boiynsha tirkelgen qylmystyq iske sáikes jedel-tergeý sharalaryn júrgizdi. Qazirgi ýaqytta tergeý amaldary jalǵasýda. Osy kezeńde tergeý múddesine orai tolyq derekter jariialanýǵa jatpaidy», - delingen UQK aqparatynda.
Eske salaiyq, 15 qańtar kúni keshke áleýmettik jeliler men birqatar buqaralyq aqparat quraldarynda Pavlodar oblysynyń ákimi Bolat Baqaýovtyń ustalǵany jáne tergelip jatqany týraly aqparat tarady.
Alaida, óńir ákimdiginiń baspasóz qyzmeti bul faktini rastaityn resmi derekter joqtyǵyn málim etip, osy oraida, qandai da bir ózge aqparat jariialaýdan aýlaq bolýǵa shaqyrdy.
Al 16 qańtar kúni tańerteń Pavlodar oblysy ákiminiń baspasóz qyzmeti ákimshilik qalypty jaǵdaida jumys istep jatqanyn aitty.
«Qazirgi ýaqytta oblys ákimdiginiń basshylyǵy qalypty rejimde jumys istep jatyr. Oblys ákimi ornynda emes, biraq ol jumys baby boiynsha qalada júr. Tańerteń ol Investorlar úiinde jinalys ótkizýi kerek edi. Biraq jumys kestesindegi ózgeristerge bailanysty kezdesýdi onyń orynbasary Arystan Qabykenov ótkizdi», - degen edi baspasóz qyzmetinen.
Aita keteiik, Bolat Jumabekuly Baqaýov Pavlodar oblysynyń ákimi bolyp 2016 jyly taǵaiyndaldy.
Ol 1971 jyly Pavlodar oblysynyń Jelezin aýdanynda týǵan. Qazaq quqyqtaný jáne halyqaralyq qatynastar institýtyn, Halyqaralyq biznes akademiiasyn bitirgen. Mamandyǵy boiynsha zańger, ekonomist-menedjer. Eńbek jolyn Pavlodar oblysy Jelezin aýdanynyń «Sovetskii Kazahstan» keńsharynda jumysshy bolyp bastaǵan. 1993-2008 jyldary Pavlodar oblysynyń shaǵyn jáne orta biznesiniń aýylsharýashylyq kásiporyndarynda kásipkerlikpen shuǵyldanǵan.
2008 jyldan bastap memlekettik qyzmetke keldi. Pavlodar oblysyndaǵy Qashyr aýdanynyń ákimi, Aqsý qalasynyń ákimi laýazymdarynda boldy. 2014-2016 jyldary - Pavlodar qalasynyń ákimi.
2002 jyly «Eren eńbegi úshin» medalimen marapattalǵan. «Oblys aldynda sińirgen eńbegi úshin» tósbelgisiniń jáne «Qurmet» ordeniniń iegeri.
