Memleket basshysy Qasym-Jomart Toqaev Resei Federatsiiasynyń Prezidenti Vladimir Pýtinge COVID-19 indetine qarsy álemdegi eń birinshi vaktsinanyń tirkelýine orai quttyqtap, jedelhat joldady. "Ult aqparat" bul týraly Aqordaǵa silteme jasap habarlaidy.
«Bul oqiǵa Resei ǵylymynyń joǵary áleýeti men bedelin naqtylai tústi. Sondai-aq Reseidiń osy jahandyq qaýip-qaterge qarsy kúrestegi jetekshi ról atqaratynyn kórsetti. Álemde qalyptasqan osynaý qiyn-qystaý kezeńde Qazaqstanǵa únemi qoldaý kórsetip, onyń ishinde, gýmanitarlyq kómek berip jáne elimizdegi sanitarlyq-epidemiologiialyq ahýaldyń jaqsarýyna úlken úles qosqan dárigerler jibergenińiz úshin Sizge rizashylyq bildiremiz», – dep jazdy Qazaqstan Prezidenti jedelhatta.
Qasym-Jomart Toqaev Qazaqstan men Reseidiń atalǵan baǵyttaǵy tiimdi yqpaldastyǵy týraly da aitty.
«Tamyz aiynyń ekinshi jartysynda Úkimettik delegatsiia reseilik vaktsinany satyp alý máselesin talqylaý úshin Máskeýge barady», – dep atap ótti Memleket basshysy.
