Qazaqstan Úkimeti qazaq tiliniń latyn grafikasyn engizý boiynsha jumys tobyn qurady. Bul týraly QR Mádeniet jáne sport ministri Arystanbek Muhamediuly málim etti, dep habarlaidy QazAqparat.
«Ǵalymdar birneshe úlgidegi grafikany tiianaqty talqydan ótkizdi. Sonyń nátijesinde kóptegen usynystar eskerilip, apostroftar arqyly jasalǵan grafikalyq nusqasy tiimdi dep tabyldy. Ǵalymdarmen bas qosqan Prezident latyn qarpine negizdelgen qazaq álipbiiniń sońǵy jobasy qyzý talqylanyp, qoǵam tarapynan qoldaý tapqanyn atap ótip, kóp uzamai qazaq tili álipbiin kirillitsadan latyn grafikasyna kóshirý týraly Jarlyqqa qol qoidy. Atap aitqanda, el azamattary, ásirese, jastar kúndelikti tájiribede latyn grafikasyn belsendi túrde nasihattai bastady. Endi memlekettik tildiń jańa álipbii kezeń-kezeńmen engiziletin bolady. Bul baǵytta ne jasalady? Birinshi kezekte, Úkimet tarapynan qazaq tiliniń latyn grafikasyn engizý boiynsha jumys toby qurylady», - dedi ministr Ortalyq kommýnikatsiialar qyzmetindegi baspasóz máslihatynda.
Onyń sózine qaraǵanda, sonymen qatar orfografiialyq-lingvistikalyq komissiia da qurylady. Latyn grafikasy negizinde jańa orfografiialyq erejeler men qazaq tiliniń úlken orfografiialyq sózdigi jasalady.
«Úshinshiden, normativtik-quqyqtyq bazany sáikestendirý qajet. Osydan keiin oqý-ádistemelik, oqýlyq, kórkem jáne basqa da qajetti ádebietterdi ázirleý men basyp shyǵarýǵa kirise alamyz», - dep túsindirdi A. Muhamediuly.
Osy oraida ol áleýmettik mańyzy bar ádebietterdi shyǵarýǵa erekshe nazar aýdarylatynyn atap ótti.
«Árine, jańa álipbidi qoǵamda ári buqaralyq aqparat quraldarynda belsendi túrde alǵa jyljytý kerek. Munymen qosa, jańa qazaq álipbiiniń tildik ortasyn keńeitý úshin jańa álipbidi jarnama salasynda qoldaný jumystaryn bastaý qajet. Sonymen qatar arnaiy oqytatyn portal men mátinderdi avtomatty túrde latyn qarpine aýdarýdyń konverteri qurylýy kerek», - dedi ministr.
