Búginde ishki suranysty qamtamasyz etý úshin taýarlar óndirisin uiymdastyrýǵa baǵyttalǵan sharalar kesheni iske asyrylýda. Bul týraly Úkimette ótken brifingte QR ulttyq ekonomika ministri Rýslan Dálenov aityp berdi, dep habarlaidy "Ult aqparat".
Ministrdiń aitýynsha, elimizde «Qarapaiym zattar ekonomikasy» baǵdarlamasy júzege asyrylyp jatyr.
«Biyl qarjylandyrý ulǵaidy, qosymsha 400 mlrd teńge bólinedi, qarajat AÓK salasynda óndirýge jáne qaita óńdeýge, óńdeý ónerkásibine, kórsetiletin qyzmetterge baǵyttalady. Bárine, óndiriske usynylǵan 133-ten asa qyzmet túrine, azyq-túlik ónimderinen bastap dári-dármekter men jabdyqtarǵa deiin 300-den asa tutynylatyn taýarlarǵa qoldaý kórsetiledi», — dedi R. Dálenov.
Sonymen qosa, nesieler 10 jyl merzimge beriledi, somasy jaǵynan shekteý joq. Syiaqy mólsherlemesi 6% quraidy, ol memleket tarapynan sýbsidiialanady.
«Eger kepilder boiynsha máseleler bolsa, eger kepil jetkilikti bolmasa, onda memlekettik kepildendirýdi alý qarastyrylǵan», — dedi ministr.
Jalpy, shaǵyn jáne orta biznesti qosymsha qarjylandyrýdyń jalpy kólemi biyl 1 trln teńgeni qurady.
«Onyń ishinde 600 mlrd teńgesi Ulttyq bank jelisi boiynsha - bul ainalym qarajatyn tolyqtyrýdy jeńildikpen qarjylandyrý baǵdarlamasy, onyń mólsherlemesi munda 8% quraidy, sondai-aq «Qarapaiym zattar ekonomikasy» baǵdarlamasy aiasynda 400 mlrd teńge, munda mólsherlemesi 6% quraidy, sebebi ony memleket sýbsidiialaidy», — dedi ol.
Sonymen qatar qosymsha qarjylandyrý «Biznestiń jol kartasy 2025» aiasynda sýbsidiialaý úshin eki eselendi, bul jeńildikpen qarjylandyrý qorjynyn ulǵaitýǵa múmkindik beredi.
Budan basqa, Memleket basshysynyń tapsyrmasymen jańa baǵyt - kásipkerlerdiń basym bóligine - shaǵyn jáne mikro bizneske jeńildikpen nesielendirýdi usyný ázirlenýde.
«Sonymen qatar, «Nurly jer», «Nurly jol», Óńirlerdi damytý baǵdarlamasy, Jumyspen qamtýdyń jol kartasy aiasynda infraqurylymdyq jobalar iske asyrylýda. Memlekettik satyp alýlarda qazaqstandyq qamtý sharalary qabyldandy - munyń barlyǵy shaǵyn jáne orta biznes sýbektilerine tikelei jáne janama qoldaý kórsetedi», — dep qosty R. Dálenov.
