QR Syrtqy ister ministrliginiń resmi ókili Aibek Smadiiarov Qyrǵyzstan taýlarynda qiyn jaǵdaiǵa tap bolǵan Qazaqstan alpinisterine qatysty jaitqa qatysty málimdeme jasady, dep habarlaidy QazAqparat.
«2019 jyldyń 17 tamyzynda Bishkektegi qazaqstandyq konsýldyqqa Qazaqstannyń 3 alpinisi Tian-Shan taýynyń (Qyrǵyzstan, Ystyqkól oblysy) Pobeda shyńynda joǵalyp ketkendigi týraly aqparat tústi. Qazaqstan azamattary Murat Ótepbaev, Andrei Korneev jáne Aleksandr Chechýlinniń 4 tamyz kúni Pobeda shyńyna saparlap shyqqandyǵy anyqtaldy. Olardyń barlyǵy da kásibi jáne tájiribeli alpinister. 14 tamyzda alpinster atalǵan shyńdy baǵyndyrǵan. Sol kúni aýa raiy nasharlap ketken», - dedi Aibek Smadiiarov.
Ministrlik málimetinshe, alpinister 15 tamyz kúni shamamen saǵat 08-15-te sońǵy ret bailanysqa shyǵyp, oryn alǵan jaitqa qatysty dabyl qaqqan. Sondai-aq, olar A.Chechýlinniń qaza tapqandyǵyn estirtken. Alpinister dabyl qaqqan sátte olar 6 900 metr biiktikte bolǵan. Shatyrlary men jabdyqtaryn jel ushyryp ketken. Olar qardan shuńqyr qazyp, soǵan jasyrynǵandyqtaryn aitqan.
«Diplomattarymyz jedel túrde bolǵan oqiǵa jaiynda Qyrǵyzstan TJM-i men Qazaqstan IIM Tótenshe jaǵdailar komitetiniń kezekshilik bólimine habar bergen. 18 tamyzda atalǵan joryqty uiymdastyrǵan týristik kompaniiaǵa tiesili tikushaq 18 tamyz kúni alpinister joǵalǵan boljamdy aýdandy sholý úshin eki ret áýege kóterildi. Ókinishke orai, nátije joq. Sebebi taýda birneshe ret kóshkin júrip, atalǵan aýdandy qar basyp qalǵan», - dedi ministrlikten.
Vedomstvo aqparatyna sáikes, qutqarý operatsiiasyna atalǵan taýly aimaqta tikushaqtyń ne bári 4 500 metrde ǵana ushýyna ruqsat berilýi, sonymen qatar qolaisyz aýa raiy kedergi keltirýde. Qazirgi ýaqytta Qazaqstan elshiliginde jedel shtab qurylyp, ol joǵalǵan alpinisterdi izdeýge barynsha kómek kórsetip jatyr. Diplomattar Qazaqstan men Qyrǵyzstannyń quziretti organdarymen jáne joǵalǵan alpinisterdiń týystarymen turaqty bailanysqa shyǵyp otyr. Konsýl men M.Ótepbaevtyń týystary túnimen Elshilikte bolyp, úilestirý máselelerin birlesip qarastyrdy. Qyrǵyz aýmaǵynda Qazaqstan tikushaqtarynyń ushýyna ruqsatty uiymdastyrý jumystary da júrgizilip jatyr. Qazaqstan tikushaqtary joǵalǵandardy izdeýge kómekke shaqyrylǵan Qazaqstan, Qyrǵyzstan jáne Reseidiń kásibi alpinister tobyn jetkizetin bolady. Bir izdeý tobyna tanymal alpinisshi Maqsut Jumaev jetekshilik etetindigi josparlanǵan.
Qazaqstan Syrty ister ministrligi alpinisterdi izdeý jumystaryn erekshe baqylaýynda ustap otyr. QR IIM TJK jáne Qorǵanys ministrlikterimen birge qyrǵyz tarapymen jedel jumystardy júrgizip jatyr.
