Búgin, Nur-Sultan qalasynyń ýaqytymen saǵat 15-00-de Qazaqstan Prezidenti Qasym-Jomart Toqaev video konferentsiia rejiminde ótetin Joǵary Eýraziialyq ekonomikalyq keńestiń otyrysyna qatysady.
Bul týraly QR Prezidentiniń baspasóz hatshysy Berik Ýáli óziniń Facebook-tegi paraqshasynda jazdy, dep habarlaidy "Ult aqparat".
Keńeske Belarýs Respýblikasy tóraǵalyq etedi.
Sammitke Eýraziialyq ekonomikalyq odaqqa múshe memleketterdiń basshylarynan bólek, baqylaýshy el esebinde Moldova Prezidenti, shaqyrylǵan memleketter retinde Ózbekstan men Kýbanyń basshylary qatysady.
Jiynda Eýraziialyq ekonomikalyq odaqty damytýdyń ózekti máseleleri, onyń ishinde, Eýraziialyq ekonomikalyq integratsiianyń 2025 jylǵa deiingi strategiialyq damý baǵyttarynyń pysyqtalǵan jobasy, Odaqtyń halyqaralyq qyzmetiniń keibir aspektileri talqylanbaq.
Is-shara qorytyndysy boiynsha Eýraziialyq ekonomikalyq odaqtyń tiimdiligin odan ári nyǵaitýǵa baǵyttalǵan birqatar qujatqa qol qoiylmaq.
