2020 jyly jastar saiasaty týraly jańa keshendi baǵdarlama ázirlenedi. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aitty, dep habarlaidy QazAqparat.
«Aldaǵy kezeńde memlekettik organdar jastarǵa qoldaý kórsetý úshin birqatar mindetterge basa nazar aýdarýy qajet. Eń aldymen, jastar saiasaty týraly jańa keshendi baǵdarlama kerek dep sanaimyn. Onda qazirgi jahandyq úrdister men jastardyń suranystary jan-jaqty eskerilýi tiis. Jastar saiasaty jónindegi jalpy tujyrymdama 20 jyl buryn ázirlengen. Qazirgi ýaqytta osy salada túrli baǵyttaǵy baǵdarlamalar óte kóp. Sondyqtan jastar saiasatyna keshendi kózqaras kerek», - dedi Memleket basshysy.
QR Prezidenti jańa baǵdarlama arqyly jastarǵa sapaly bilim berý, jumysqa turý, qoljetimdi baspanamen qamtamasyz etý tetikteri usynylýy kerektigin aitty.
«Jastardyń kásibi biliktiligin arttyrýǵa jaǵdai jasalýy qajet. Qujatta jas býynǵa arnalǵan tiimdi ári ashyq áleýmettik múmkindikter kórsetilýi kerek. Barlyq eldi mekenderdegi sport jáne mádeniet nysandary jastarǵa qoljetimdi bolýy tiis Úkimet kelesi jyly osy baǵdarlamany daiyndap, onyń negizinde 2021 jyly zań jobasyn ázirleýi qajet», - dedi Qasym-Jomart Toqaev.
