Ulttyq qoǵamdyq senim keńesi tolyqqandy institýtqa ainaldy. Bul týraly Ulttyq qoǵamdyq senim keńesiniń 6-otyrysynda QR Prezidenti Qasym-Jomart Toqaev aitty, dep habarlaidy QazAqparat.
«Ulttyq qoǵamdyq senim keńesi az ýaqyttyń ishinde tolyqqandy institýtqa ainaldy. Bul qurylym elimizdi jańǵyrtý úderisine tyń serpin berýde. Biz máselelerdi keshendi túrde qaraý úshin qoǵam ókilderin, sarapshylar men úkimettik emes uiymdardy jumyldyryp kelemiz. Sonyń nátijesinde jan-jaqty talqylanǵan mańyzdy sheshimder qabyldanýda. Ulttyq keńes naqty reforma usynýmen shektelip otyrǵan joq. Eń aldymen, ony júzege asyrýǵa barynsha atsalysýda. Bul - kóp eńbekti talap etetin aýqymdy jumys. Tujyrymdar muqiiat talqylanyp, zań jobalary saraptamadan ótedi. Sondai-aq qoldanysqa engizilgen normalardyń tiimdiligine taldaý jasalady», - dedi Qasym-Jomart Toqaev.
Memleket basshysy Ulttyq keńes músheleriniń qatysýmen elimizdegi ózgerister týraly birqatar saraptamalyq qujat ázirlengenin atap ótti. Degenmen, keńestiń taldaý qyzmeti júieli ári turaqty bolýy úshin zertteý jumystarynyń keshendi josparyn daiyndaý kerektigine nazar aýdartty.
«Bul rette jańǵyrý úderisterin jan-jaqty ári tereń zertteýge basa nazar aýdarý qajet. Ulttyq keńes reformalarǵa turaqty monitoring júrgizip otyrǵany abzal. Ony burmalaýǵa nemese ózgerister týraly jańsaq pikir qalyptasýyna jol bermeý kerek. Qabyldanǵan normativtik aktiler, saiasi reformalar men áleýmettik-ekonomikalyq bastamalar turǵyndardyń turmysyna qalai áser etip jatqanyn qadaǵalap otyrǵan jón. Qolǵa alynǵan ózgerister elimizdegi demokratiia qaǵidattaryn ornyqtyra túsýge tiis. Sondai-aq azamattardyń ál-aýqatyn arttyrýǵa yqpal etýi qajet. «Halyq úninen qulaq asatyn memleket» tujyrymdamasyn júzege asyrýǵa septigin tigizýi kerek», - dedi QR Prezidenti.
