ۇلتتىق قوعامدىق سەنٸم كەڭەسٸ تولىققاندى ينستيتۋتقا اينالدى. بۇل تۋرالى ۇلتتىق قوعامدىق سەنٸم كەڭەسٸنٸڭ 6-وتىرىسىندا قر پرەزيدەنتٸ قاسىم-جومارت توقاەۆ ايتتى, دەپ حابارلايدى قازاقپارات.
«ۇلتتىق قوعامدىق سەنٸم كەڭەسٸ از ۋاقىتتىڭ ٸشٸندە تولىققاندى ينستيتۋتقا اينالدى. بۇل قۇرىلىم ەلٸمٸزدٸ جاڭعىرتۋ ٷدەرٸسٸنە تىڭ سەرپٸن بەرۋدە. بٸز مەسەلەلەردٸ كەشەندٸ تٷردە قاراۋ ٷشٸن قوعام ٶكٸلدەرٸن, ساراپشىلار مەن ٷكٸمەتتٸك ەمەس ۇيىمداردى جۇمىلدىرىپ كەلەمٸز. سونىڭ نەتيجەسٸندە جان-جاقتى تالقىلانعان ماڭىزدى شەشٸمدەر قابىلدانۋدا. ۇلتتىق كەڭەس ناقتى رەفورما ۇسىنۋمەن شەكتەلٸپ وتىرعان جوق. ەڭ الدىمەن, ونى جٷزەگە اسىرۋعا بارىنشا اتسالىسۋدا. بۇل - كٶپ ەڭبەكتٸ تالاپ ەتەتٸن اۋقىمدى جۇمىس. تۇجىرىمدار مۇقييات تالقىلانىپ, زاڭ جوبالارى ساراپتامادان ٶتەدٸ. سونداي-اق قولدانىسقا ەنگٸزٸلگەن نورمالاردىڭ تيٸمدٸلٸگٸنە تالداۋ جاسالادى», - دەدٸ قاسىم-جومارت توقاەۆ.
مەملەكەت باسشىسى ۇلتتىق كەڭەس مٷشەلەرٸنٸڭ قاتىسۋمەن ەلٸمٸزدەگٸ ٶزگەرٸستەر تۋرالى بٸرقاتار ساراپتامالىق قۇجات ەزٸرلەنگەنٸن اتاپ ٶتتٸ. دەگەنمەن, كەڭەستٸڭ تالداۋ قىزمەتٸ جٷيەلٸ ەرٸ تۇراقتى بولۋى ٷشٸن زەرتتەۋ جۇمىستارىنىڭ كەشەندٸ جوسپارىن دايىنداۋ كەرەكتٸگٸنە نازار اۋدارتتى.
«بۇل رەتتە جاڭعىرۋ ٷدەرٸستەرٸن جان-جاقتى ەرٸ تەرەڭ زەرتتەۋگە باسا نازار اۋدارۋ قاجەت. ۇلتتىق كەڭەس رەفورمالارعا تۇراقتى مونيتورينگ جٷرگٸزٸپ وتىرعانى ابزال. ونى بۇرمالاۋعا نەمەسە ٶزگەرٸستەر تۋرالى جاڭساق پٸكٸر قالىپتاسۋىنا جول بەرمەۋ كەرەك. قابىلدانعان نورماتيۆتٸك اكتٸلەر, ساياسي رەفورمالار مەن ەلەۋمەتتٸك-ەكونوميكالىق باستامالار تۇرعىنداردىڭ تۇرمىسىنا قالاي ەسەر ەتٸپ جاتقانىن قاداعالاپ وتىرعان جٶن. قولعا الىنعان ٶزگەرٸستەر ەلٸمٸزدەگٸ دەموكراتييا قاعيداتتارىن ورنىقتىرا تٷسۋگە تيٸس. سونداي-اق ازاماتتاردىڭ ەل-اۋقاتىن ارتتىرۋعا ىقپال ەتۋٸ قاجەت. «حالىق ٷنٸنەن قۇلاق اساتىن مەملەكەت» تۇجىرىمداماسىن جٷزەگە اسىرۋعا سەپتٸگٸن تيگٸزۋٸ كەرەك», - دەدٸ قر پرەزيدەنتٸ.
