Qazaqstannyń jaqyn bolashaqta alys jáne jaqyn mańdaǵy elder úshin eń tartymdy oryndardyń birine jáne etnotýrizmniń ortalyǵyna ainalý múmkindigi bar.
Bul týraly Qaraǵandy oblysynda ótip jatqan «Ulytaý – 2019» Halyqaralyq týristik forýmynda Memleket basshysy Qasym-Jomart Toqaev aitty, dep habarlaidy QazAqparat Aqordanyń Twitter-degi paraqshasyna silteme jasap.
«Biz salalyq memlekettik baǵdarlama qabyldadyq. Ol tolyqqandy júzege asatyn bolsa, týrizmniń Ishki jalpy ónimdegi úlesi 8% jetedi. Syrttan keletin týrister sany 9 mln al, ishki týrister sany 8 mln adam bolady. Al týrizm salasynda jumyspen qamtylǵandar sanyn 650 myń adamǵa jetkizý kerek»,-dedi Qasym-Jomart Toqaev.
Memleket basshysy sózinde kreativti jáne innovatsiialyq sheshimderdiń kómegimen Qazaqstannyń týristik áleýetiniń aqparattyq qoljetimdiligin tiisti deńgeide qamtamasyz etý kerektigin jetkizdi.
«Týristerdi Qazaqstan týraly ásirese Ulytaý men ózge de tarihi oryndar týraly tolyqqandy aqparatpen qamtamasyz ete alatyn qosymsha nemese basqa bir kiriktirilgen platforma jasaý kerek. Týrizm indýstriiasynan keletin salmaqty mýltiplikativti serpindi eskere kele bizge Qazaqstannyń barlyq rekreatsiialyq aýmaqtarynda qonaqúiler men tamaqtaný oryndaryn salý isine barynsha kásipkerlerdi tartý kerek. Bul rette «Atameken» Ulttyq kásipkerler palatasynyń da múmkindikterin paidalanǵan jón»,-dedi Memleket basshysy.
